20 ёшли франциялик Lego коллекционери ва видеоблогер Луис уйига ўғри тушиб, деярли ҳамма конструкторларни ўмариб кетгани ҳақида сўзлаб берди, деб ёзади TJournal.
«Хайр» деб номланувчи роликда видеоблогер кўзида ёш билан коллекцияни 2004 йилдан буён йиғиб келаётганини айтган. Унинг нархи 16 минг евродан ортиқ бўлган. Луис энди Lego конструкторларини коллекция қилишни ташлашини, чунки янги Lego учун шунча пул йиға олмаслигини таъкидлаган.
«Туни билан йиғлаб чиқдим. Молиявий бойлигимдан ташқари, бутун болалигимни ҳам ўғирлаб кетишди. Коллекциямнинг катта қисми ўмариб кетилган, 10 ойга яқин вақтимни сарфлаган сўнгги ижод намунам эса барбод қилинган. 14 йиллик Lego йиғиш ва саккиз йиллик видеоблогерликни ташлайман. Мени шунча йиллардан буён кузатиб келганингиз учун раҳмат. Хайр», — дея хайрлашди Луис.
Twitter ва Reddit форуми фойдаланувчилари Луисга ёрдам бериш йўлларини қидира бошлади. Кимдир ўзидаги Lego тўпламини беришга рози бўлган бўлса, бошқалар Lego компаниясига хат ёзиб, коллекцияни қайта тиклашда ёрдам сўради.
Маблағ йиғиш бўйича GoFundMe майдончасида эса видеоблогерга ёрдам бериш истагидагилар 18 минг доллар пул йиғди. Бу коллекцияни қайта тиклаш харажатларини қоплади.
Луис уни қўллаб-қувватлаганлар, оғир вазиятда ёрдам қўлини чўзганларга миннатдорлик билдирди.
Изоҳ (0)