Ўзбек ноширлари Франкфурт китоб кўргазмасида қатнашиш учун Германияга жўнаб кетди

Бугун, 8 октябрь куни Ўзбекистон Матбуот ва ахборот агентлиги ҳамда агентлик тизимидаги нашриётлар, шунингдек, оммавий ахборот воситалари вакилларидан иборат ўзбек делегацияси 10—14 октябрь кунлари Франкфурт шаҳрида бўлиб ўтадиган йирик китоб кўргазмасида қатнашиш учун Германияга жўнаб кетди. Бу ҳақда Ўзбекистон матбуот ва ахборот агентлиги хабар бермоқда.

Frankfurter Boochmesse, яъни Франкфурт китоб кўргазмаси — дунёдаги энг катта китоб кўргазмаси. Ушбу кўргазма ҳар йили Франкфуртда октябрь ойи ўрталарида бўлиб ўтади.

Бу ерда китоб оламидаги сўнгги янгиликлар билан танишиш, ноширлик бозорининг йўналишларини ўрганиш мумкин.

Франкфурт китоб ярмаркаси мутахассислар анжуманидир. Мутахассислар бу ерга бошқа қитъадаги китоб маҳсулотлари тарқатувчилари билан алоқа ўрнатиш, машҳур матнларни нашр этиш ҳуқуқини олиш, типография янгиликлари билан танишиш учун келади. Кўргазмада китоблар, журналлар, газеталар ва бошқа босма ва даврий нашрлар, атласлар ва хариталар, электрон ахборот воситалари, тақвимлар, комикслар, санъат воситалари тақдим этилади, кутубхоначилик иши ёритилади.

Франкфурт кўргазмасида ноширлар, агентлар, сотувчилар, ёзувчилар, таржимонлар, рассомлар, иллюстраторлар, кутубхона вакиллари, институтлар ва бошқа мутахассисларни учратиш мумкин. Кўргазма билан бир қаторда Франкфуртер Бучмессе доирасида семинарлар, давра суҳбатлари, концертлар ва бошқа маданий тадбирлар ташкил этилади.

Анъанага кўра, кўргазмага ташриф буюрган мамлакатлардан бири ҳурматли меҳмон сифатида иштирок этади. 2009 йилда Хитой, 2010 йилда Аргентина, 2011 йилда Исландия, 2012 йилда Янги Зеландия, 2013 йилда Бразилия, 2016 йилда Туркия, 2017 йилда эса Франция мамлакати ҳурматли меҳмон бўлган эди. 2018 йил Франкфурт китоб кўргазмасининг ҳурматли меҳмон мамлакати — Грузия бўлиши кутилмоқда.

2011 йил ярмаркада 106 мамлакатдан 7 384 иштирокчи ва 280 194 нафар меҳмон ташриф буюрган бўлса, 2012 йилда 281 753 киши қатнашган. 2013 йилда эса 276 минг нафар меҳмон рўйхатдан ўтган.

Франкфурт китоб кўргазмасининг тарихи 500 йилдан зиёд вақтни ташкил этади ва унинг асосчиси сифатида Франкфурт ёнидаги Майнцда яшаб ўтган биринчи китоб ношири Иоганн Гуттенберг эътироф этилади.