Мингбулоқда туман тарихида илк бор бир неча мураккаб жарроҳлик амалиётига қўл урилди. Бу ҳақда «Дарё»га Наманган вилоят соғлиқни сақлаш бошқармаси матбуот хизмати маълум қилди.
Туман тиббиёт бирлашмаси шошилинч тиббий ёрдам бўлимида ўтказилган кардиологик жарроҳлик амалиёти давомида туғма юрак хасталиги билан дунёга келган 5 ёшли Хонзода Абдурашидованинг мурғак юрагига озор бераётган нуқсон барҳам топди. Тиббиёт фанлари номзоди Нуриддин Баҳриддинов вилоят кардиология марказидан келган ҳамкасблари билан қалтис операцияни муваффақиятли якунига етказди.
Кун давомида бошқа йўналишлар бўйича яна 5 та жарроҳлик амалиёти олиб борилди. Жумладан, Республика шошилинч тиббий ёрдам илмий маркази бош эндоскописти Абдурашид Мамажонов қизилўнгач варикоз кенгайган веналаридан қон кетишни тўхтатиш мақсадида эндоскопик лагатура қўйиш амалиётини бажарди. Вилоят перинатал маркази директори Ўзганбой Раҳимов ва тиббиёт фанлари номзоди Лола Абдуллаева туғруқ комплексида аёллар репродуктив аъзоларидаги хавфли касалликларни бартараф этишга муваффақ бўлди. Шунингдек, вилоят кўп тармоқли тиббиёт маркази, Республика шошилинч тиббий ёрдам илмий маркази Наманган филиали мутахассислари маҳаллий шифокорларга лапроскопик холецист эктомия — қорин бўшлиғини дренажлаш операциялари қай усулда бажарилишини кўрсатиб берди.
Туман кўп тармоқли марказий поликлиникасида ташкилланган «Маҳорат дарслари» эса тиббиётнинг қуйи тизимларида қўлланиши мўлжалланаётган юқори технологик жарроҳлик амалиётларини татбиқ этиш масалаларига бағишланди.
Изоҳ (0)