Чеченистон раҳбари Рамзан Қодиров Мустақиллик байрами муносабати билан Президент Шавкат Мирзиёев ва ўзбекистонликларни қутлади.
«Бугун биродар Ўзбекистонда катта байрам! Мамлакат Мустақиллик кунини нишонламоқда. Гарчи ушбу сана тақвимга ўттиз йилча аввал киритилган бўлса ҳам, Ўзбекистон халқлари жаҳон цивилизациясига — фан, маданият, санъат, тиббиётга муносиб ҳисса қўшган қадим давлат ҳисобланади.
Ўзбекистон ҳудудида дунё аҳамиятига эга меъморий ва маданий ёдгорликлар жойлашган. Хусусан, ислом дини ва унинг буюк намояндалари билан боғлиқ объектлар сақланиб қолган», — дейилади Рамзан Қодировнинг Facebook’даги саҳифасида жойлаштирилган табрикда.
Чеченистон раҳбари ўз қутловида Ўзбекистонга сафари билан боғлиқ хотиралари, шунингдек, ўзбек халқи ва унинг етакчисига тилакларини келтириб ўтган.
«Ўзбекистонга яқинда амалга оширган ташрифим, Президент Шавкат Мирзиёев билан самарали суҳбат, шунингдек, вазирлар, ҳокимлар, маданият арбоблари билан мулоқотлар, меҳнат жамоаларига борганимни мамнуният билан хотирлайман. Ўзбекистон тобора юксалаётгани, иқтисодиёт ва ижтимоий соҳа жадал суръатлар билан ривожлантириб бораётгани кишини хурсанд қилади.
Ўзбек халқи учун ардоқли кунда Шавкат Миромонович ва мамлакатнинг барча фуқароларини байрам билан самимий табриклайман. Тинчлик, барқарорлик ва фаровонлик тилайман!»
Изоҳ (0)