Тиббиёт фанлари доктори Қаҳрамон Юлдашев Республика ОИТСга қарши курашиш маркази директори лавозимида иш бошлади. Бу ҳақда Соғлиқни сақлаш вазирлиги ахборот хизмати хабар бермоқда.
Қаҳрамон Юлдашев 10 августга қадар Тошкент врачлар малакасини ошириш институти тиббий профилактика факультети декани лавозимида ишлаб келаётган эди.
«Унга, аввало, ОИВ инфекциясини эрта аниқлаш, уни профилактикасини ўз вақтида амалга ошириш, диагностика ва даволаш стандартларини қайта кўриб, замонавий ҳамда инновацион технологияларни кенг жорий этиш, ушбу касалликка қарши самарали курашиш, беморларга тиббий-ижтимоий ёрдам кўрсатиш сифатини тубдан яхшилаш, шифохона ички инфекциялари билан касалланиш ҳолатларини кескин камайтириш сингари муҳим вазифалар юклатилди», — дейилади вазирлик ахборотида.
Шунингдек, Юлдашев бугунги кун талабидан келиб чиқиб мутахассислар малакасини ошириш, иммунология, вирусология ва эпидемиология йўналишларида илмий ишларни ривожлантириш, шу билан бирга, аҳоли ўртасида ушбу касалликка қарши самарали тарғибот ишларини кучайтириш, жаҳоннинг нуфузли харқаро ташкилотлари билан ҳамкорликни мустаҳкамлаш каби қатор устувор масалаларга ҳам масъул этиб белгиланган.
Изоҳ (0)