Тошкент шаҳрида қарийб 28 минг хонадонли 638 та кўп қаватли уй қурилмоқда

Шавкат Мирзиёев Сергели тумани «Чоштепа» маҳалла фуқаролар йиғини ҳудудида қурилаётган янги уй-жойлар билан танишди. Бу ҳақда ЎзА хабар бермоқда.

Бу ерда Тошкент шаҳар ҳокимлиги томонидан ажратилган 30 гектар ер майдонида чет эллик инвесторлар иштирокида янги қурилиш технологиялари асосида жами 4 минг 20 хонадонли 72 та 7 қаватли уй қурилмоқда.

Президент ташаббуси билан 2017 йилдан бошлаб мамлакатнинг барча шаҳарларида турар жойга муҳтож оилалар учун арзон ва ҳар томонлама қулай уй-жойлар қурилиши бошланди. Аҳоли учун зарур бўлган бундай арзон уйлар узоқ йиллар давомида Тошкент шаҳрида бирорта ҳам қурилмаган эди. Шаҳарларда қурилган уйлар ҳам асосан қиммат тижорат уйлари бўлиб, бу уйларни ижтимоий ҳимояга муҳтож ва бюджетдан маош оладиган оилалар олиш имкониятига эга бўлмаган.

Шуларни инобатга олган ҳолда, Сергели туманида 2017–2022 йилларда 500 кўп қаватли уй қурилиши бўйича махсус дастур ишлаб чиқилди. Бу йирик лойиҳанинг амалга оширилиши қарийб 30 минг оиланинг уй-жойга бўлган эҳтиёжини қондириш имконини беради.

Дастур ижроси доирасида 2017 йилда Тошкент шаҳрининг Сергели туманида 102 кўп қаватли арзон уйлар қурилиб, 4 минг 88 хонадон ўз эгаларига топширилди.

Тошкент шаҳрида барча манбалар ҳисобига қарийб 28 минг хонадонли 638 кўп қаватли уйлар қурилмоқда. Жумладан, замонавий лойиҳалар асосида жами 15 минг 740 хонадонли 334 арзон уйлар қурилиши амалга оширилаётган бўлиб, бу ўтган йилга нисбатан 3 баробар кўпдир.