Танзила Норбоева: Самарқандлик синглимизга қилинган қўпол муносабатни аёл сифатида, қўмита раҳбари сифатида кескин қоралайман

Ўзбекистон Бош вазирининг ўринбосари Танзила Норбоева Каттақўрғонда ички ишлар ходими томонидан аёл киши таҳқирланганига  навбатдаги муносабатини билдирди.

«Ҳурматли юртдошлар! Самарқандлик синглимизга қилинган қўпол муносабатни мен аёл сифатида, Қўмита раҳбари сифатида кескин қоралайман. Шу кимсанинг жазоланиш жараёнини албатта шахсий назоратимга оламан. Суд жараёнида ҳам албатта вакилларимизнинг қатнашиб, Аёл шаънини ҳимоя қилинишини таъминлайман. Бундай ҳолат қайтарилмаслиги юзасидан ички ишлар вазирлиги билан музокаралар ташкил қилинишини маълум қиламан», — дейилади Норбоеванинг Facebook’даги саҳифасида қолдирилган постда.

Танзила Норбоеванинг ижтимоий тармоқдаги аввалги чиқиши, хусусан, ундаги «Бу ҳолат мутлақо ички ишлар идоралари фаолиятига дахлдор эмас» деган жумла кўпчиликда таажжуб уйғотганди. Бу галги муносабат ҳам бундан холи бўлмади.

Фойдаланувчилардан бири «музокаралар билан иш битмаслиги»ни таъкидласа, бошқаси Каттақўрғонда олдинроқ Диана Еникеева ҳалок бўлгани, Хотин-қизлар қўмитаси эса бунга ҳеч қандай муносабат билдирмаганини эслатган.

Яна бир фойдаланувчи «Бу қўпол муносабат эмас, балки ўта ноинсоний қилмиш. Агар шундайлар жазоланмай қолса, жамиятда адолатсизлик авж олади», дея Бош вазир ўринбосарининг сўзларига тузатиш киритган.