Ўзбекистон ҳуқуқ-тартибот идоралари жорий йил 1 ноябрга қадар жонига қасд қилишга мойиллиги бўлган шахслар билан ишлаш бўйича чора-тадбирлар комплексини ишлаб чиқади. Бу ҳақда Ички ишлар вазирлигидаги манбага таяниб, «Podrobno.uz» маълум қилди.
«Қатор муассасалар суицидлар қилишга ундовчи ва уларни амалга оширишга ўргатувчи маълумотлар ёритиладиган сайтлар фаолиятига чек қўйиш учун ижтимоий тармоқлар ва интернетда жойлаштириладиган маълумотларни мониторинг қилиб бориши кўзда тутилган. Шунингдек, глобал тармоқда мураккаб ҳаётий вазиятлардан чиқиш ва стрессларга бардошлилик усуллари акс этадиган сайтлар яратилади, хавф гуруҳидаги шахсларга психологик маслаҳатлар бериб бориладиган, ижтимоий реабилитация ва кўниктириш муассасалари телефонлари кўрсатилган SMS-хабарлар йўлланади», — деди нашр суҳбатдоши.
Маълумот учун, Ўзбекистонда жорий йил 1 май ойи ҳолатига вояга етмаганлар 153 та ўз жонига қасд ҳолати қайд этилди. Бу ўтган йилнинг шу даврига нисбатан 10 тага кам.
Изоҳ (0)