Тошкентлик божхоначилар пойтахтлик фуқаро номига жўнатилган 150 дона психотроп таблеткани ушлаб қолди

Халқаро почта Конвенциясига асосан, почта жўнатмалари орқали психотроп ва наркотик воситаларнинг юборилиши қатъиян тақиқланган. Ўзбекистон Республикаси «Гиёҳвандлик воситалари ва психотроп моддалар тўғрисида»ги Қонунининг 17-моддасида гиёҳвандлик воситалари, психотроп моддалар ва прекурсорларни почта жўнатмаларида, шу жумладан халқаро почта жўнатмаларида жўнатиш тақиқланиши кўрсатиб ўтилган, деб ёзади Божхона қўмитаси ахборот хизмати.

«Аммо шунга қарамай, почта жўнатмалари орқали қонунга хилоф равишда таркибида психотроп ва наркотик моддалар мавжуд бўлган дори воситаларини жўнатиш ҳолатлари учраб турибди», — дейилади хабарда.

Жумладан, Тошкент шаҳар божхона бошқармасининг «Бош почтампт» ташқи иқтисодий фаолият божхона постида Контрабанда ва божхона конунчилиги бузилишига карши курашиш бўлими ходимлари шу турдаги қоидабузарликни фош қилди.

Пойтахтлик А.В. номига хориждан юборилган почта жўнатмаси божхона назоратининг техник воситасидан фойдаланиб божхона кўригидан ўтказилганда, буюмлар орасида «CN-23» шаклидаги божхона декларациясида кўрсатилмаган 150 дона таркибида Bromozepam психотроп моддаси бўлган Lexostad номли таблеткалари борлиги аниқланди.

Ҳозирда юқоридаги ҳолат юзасидан божхона текширувлари давом эттирилмоқда.