Xalqaro pochta Konvensiyasiga asosan, pochta jo‘natmalari orqali psixotrop va narkotik vositalarning yuborilishi qat’iyan taqiqlangan. O‘zbekiston Respublikasi “Giyohvandlik vositalari va psixotrop moddalar to‘g‘risida”gi Qonunining 17-moddasida giyohvandlik vositalari, psixotrop moddalar va prekursorlarni pochta jo‘natmalarida, shu jumladan xalqaro pochta jo‘natmalarida jo‘natish taqiqlanishi ko‘rsatib o‘tilgan, deb yozadi Bojxona qo‘mitasi axborot xizmati.
“Ammo shunga qaramay, pochta jo‘natmalari orqali qonunga xilof ravishda tarkibida psixotrop va narkotik moddalar mavjud bo‘lgan dori vositalarini jo‘natish holatlari uchrab turibdi”, — deyiladi xabarda.
Jumladan, Toshkent shahar bojxona boshqarmasining “Bosh pochtampt” tashqi iqtisodiy faoliyat bojxona postida Kontrabanda va bojxona konunchiligi buzilishiga karshi kurashish bo‘limi xodimlari shu turdagi qoidabuzarlikni fosh qildi.
Poytaxtlik A.V. nomiga xorijdan yuborilgan pochta jo‘natmasi bojxona nazoratining texnik vositasidan foydalanib bojxona ko‘rigidan o‘tkazilganda, buyumlar orasida “CN-23” shaklidagi bojxona deklaratsiyasida ko‘rsatilmagan 150 dona tarkibida Bromozepam psixotrop moddasi bo‘lgan Lexostad nomli tabletkalari borligi aniqlandi.
Hozirda yuqoridagi holat yuzasidan bojxona tekshiruvlari davom ettirilmoqda.
Izoh (0)