Олий Мажлис Сенатининг XV ялпи мажлисида Андижон вилояти ҳокими Шуҳрат Абдураҳмоновнинг ҳудудларни ривожлантириш ҳамда халқ депутатлари маҳаллий Кенгашлари фаолияти ҳақидаги ҳисоботи тингланди. Бу ҳақда «Дарё» мухбири Севара Нишонова хабар бермоқда.
Ҳокимнинг қайд этишича, вилоятни комплекс ривожлантириш ва бу жараёнда халқ депутатлари маҳаллий Кенгашлари салоҳиятидан фойдаланиш борасида муайян ишлар амалга оширилган. Хусусан, 2017 йилда вилоят ялпи ҳудудий маҳсулоти ҳажмининг ўсиши 6,7 фоизни ташкил этган. Тегишли дастурлар доирасида 1,5 триллион сўмдан зиёд инвестициялар ўзлаштирилиб, қарийб 3040 та лойиҳа амалга оширилган. Бунинг эвазига 42,3 мингдан ортиқ янги иш ўрни яратилган. 2476 та хусусий тадбиркорлик ва кичик бизнес субъектлари ташкил этилган, тижорат банклари томонидан уларга 1,2 триллион сўмлик кредит ажратилган.
Вилоятда Ўзбекистон Президентининг жорий йил 7 июндаги тегишли қарори билан тасдиқланган «Ҳар бир оила — тадбиркор» дастурини амалга ошириш бўйича ишлар бошланди. 130 та ижтимоий соҳа объекти — шифохоналар, мактаблар, мактабгача таълим муассасалари, ичимлик сув объектлари фойдаланишга топширилди. 24 та қишлоқ массивида 1165 та арзон уй-жой, шу жумладан, профилактика инспекторлари учун 326 та хизмат уйи барпо этилди.
Шу билан бирга, сенаторлар Андижон вилоятида ҳудудларни ривожлантиришга ҳамда халқ депутатлари маҳаллий кенгашлари фаолиятининг самарадорлигини оширишга салбий таъсир кўрсатаётган муаммо ва камчиликлар борлигини, мавжуд салоҳиятдан тўлиқ фойдаланилмаётганини таъкидлади.
Хусусан, тадбиркорлик субъектлари дуч келаётган муаммоларни ўз вақтида бартараф этиш чоралари лозим даражада кўрилмагани оқибатида 2017 йилнинг ўзида 4000 дан зиёд, 2018 йилнинг биринчи чорагида эса 251 та кичик бизнес субъекти фаолияти тўхтатилган ва минглаб иш ўринлари йўқотилган. Аҳоли эҳтиёжларига мос равишда иш ўринлари ташкил этиш, мавжуд иш ўринларини малакали кадрлар билан тўлдириш масалалари тўлиқ ҳал этилмаяпти.
Муҳокама якунлари бўйича тегишли қарор қабул қилинди.
Изоҳ (0)