Жиззах ИИБда махсус тергов хоналари ишга туширилди

Жиззах вилояти ИИБ тергов бошқармаси ва унинг қуйи тизимларида тергов хонаси, ўсмирларни тергов қилиш ва оператор хоналаридан иборат мажмуа ишга туширилди. Мажмуа тергов жараёнини стенография қилиш, видеоназорат, шунингдек, тергов ҳаракатларини аудио ва видео шаклда ёзиб олиш усукуналари билан жиҳозланган электрон дастур асосида ишлайди, дея хабар беради ЎзА.

Ушбу махсус тергов хоналари қурилишида жабрланувчи ва гувоҳларни гумон қилинаётган шахс билан юзлаштиришга амал қилинадиган халқаро меъёрлар ҳисобга олинган. Бунда гумон қилинувчи шахс ўзига кўрсатма бераётган жабрланувчи билан юзма-юз кўришмайди, балки алоҳида хонада ўрнатилган монитор орқали уларни кўради. Гувоҳ ёки жабрланувчи гумон қилинаётган шахсни кўрмайди.

Сабаби, жиноятга алоқадор шахсни кўрган жабрланувчи руҳий зарба олиши мумкин. Бу эса тергов жараёнини оғирлаштирадиган ҳолатлардан ҳисобланади. Шу сабабли мажмуада назорат камералари ўрнатилган, тасвирни керакли хонадаги мониторга етказиш билан операторлар шуғулланади.

Мазкур электрон дастур ходимларнинг хизмат ва шахсий компьютерларини, ҳар қандай ҳужжатларнинг қонуний тузилишини назорат қилиш, терговчи ва суриштирувчилар томонидан тергов қилинаётган жиноят ишларининг тегишли қарорларини масофадан кўриш, шунингдек, бошқа маълумотларни алмашиш имконини беради.

Хоналарга ўрнатилган кузатув камералари орқали тергов жараёни ёзиб борилади.

— Бу тизимнинг жорий этилиши тергов қилинаётган шахсга психологик ва жисмоний тазйиқ ўтказиш, шунингдек, бошқа ғайриинсоний ва ноқонуний усулларни қўллашни бартараф этади, — дейди вилоят ИИБ транспортда жамоат хавфсизлигини таъминлаш бўлими ҳузуридаги тергов гуруҳи катта терговчиси Элёр Пўлатов. — Барча тергов ходимлари компьютер ва бошқа ахборот технологиялари билан тўлиқ таъминланган. Бу терговчиларга бир-бири билан ўзаро ахборот алмашиш, маслаҳатлашиш имконини беради.