Александр Лукашенко Шавкат Мирзиёев ҳақида: ақлли, истеъдодли одам ва менинг дўстим

Беларусь президенти Александр Лукашенко Ўзбекистон билан муносабатлар ривожидаги юқори динамикани қайд этди, деб ёзади «Podrobno.uz». Бу ҳақда у Ўзбекистон Олий Мажлис Сенати раиси Ниғматулла Йўлдошев билан учрашувда айтиб ўтди.

«Сўнгги бир йил, ёки янги даврни ҳисобга оладиган бўлсак, балки ундан сал кўпроқ вақт ичида Беларусь-Ўзбекистон алоқаларида ўтган 20 йилдагидан кўпроқ нарсага эришдик, мен бу ҳақда дўстим Шавкатга (Ўзбекистон Президенти Шавкат Мирзиёевга) кўп айтаман. Менинг хизматим бу ерда минимум. Ҳамма хизмат сизнинг президентингизники. Бош вазир чоғидаёқ бутун дунёни кўриб, нафақат Минск-Тошкент нуқтаи назаридан, балки барча йўналишлар бўйича вазиятни хотиржамлик билан баҳолаган ва катта қадамлар билан олға силжиган ақлли, истеъдодли одам», — деди Беларусь раҳбари.

Лукашенконинг сўзларига кўра, икки мамлакат президентлари Хитойдаги ШҲТ саммити доирасида яқиндан гаплашиб олган.

Беларусь президенти Ўзбекистоннинг асосий ютуқлари иқтисодиётда эканлигини айтди.

«Биз, албатта, сизнинг муваффақиятларингиздан хурсандмиз. Биз сизнинг фаол тарафдорларингизмиз… Бизга суянишингиз мумкин», — дея ишонтирди Лукашенко.