Ўзбекистон аҳолиси Хитойнинг AliExpress онлайн савдо дастури орқали янада кўпроқ маҳсулотлар сотиб ола бошлади. Бу ҳақда China News Service ахборот агентлиги ШҲТ саммитига оид материаллар асосида маълум қилди, дея хабар берди «Халқ сўзи».
Alibaba компанияси ўзаро олди-сотдининг аниқ рақамларини ошкор этмаяпти, бироқ хабар беришича, Ўзбекистон аҳолисининг бу борадаги транзакциялари ҳажми 90 фоиз, Тожикистонда 110 фоиз ва Қозоғистонда 82 фоизга ошган.
«Мазкур мамлакатлар аҳолиси асосан кийим-кечаклар, акссесуарлар, мобил телефонлар, маиший техника ва косметика маҳсулотларини харид қиляпти», дейилади унда.
Умуман олганда, 2017 йилда ШҲТга аъзо давлатлар ҳудудида яшовчи 20 миллиондан зиёд киши AliExpress орқали харидларни амалга оширган.
Ушбу давлатлардаги Alibaba сотувчилари сони 80 миллион нафарга етган ва бу охирги уч йилдаги кўрсаткичлар саккиз баробар ортганини англатади. Уларнинг неча нафари Ўзбекистон ҳиссасига тўғри келиши маълум эмас.
Компания ШҲТга аъзо мамлакатлар ҳудудида анъанавийдан кўра электрон савдо қулайроқ эканлигини эътироф этяпти. Яқин йиллар ичида Alibaba минтақадаги иштирокини кенгайтирмоқчи.
Юқорида номи тилга олинган дастур охирги беш йил давомида мамлакатда App Store бўйича етакчи бўлиб келмоқда ва бу борадаги анъанавий етакчи Telegram’ни ортда қолдирмоқда.
Ўзбекистонлик фойдаланувчилар харид учун Visa, MasterCard, UnionPay каби конвертация ва валюта карталари, Qiwi ёки WebMoney тизимлари орқали пул тўлашлари мумкин.
Кобейжинг карталари чиқиши билан бу борада улардан ҳам фойдаланиш имконияти пайдо бўлади. Бунинг учун валютани конвертация қилиш шарт эмас, тизим ўзига зарур суммани керакли валютада, ҳатто картада ўзбек сўми бўлса ҳам, ечиб олаверади.
Изоҳ (0)