Тошкентда 7 июнь куни Халқаро пресс-клуб майдонида "Ҳомийлик: янги анъаналарни шакллантириш" мавзусида мулоқот ўтказилади. Бу ҳақда Sputnik хабар берди.
Тадбир ташкилотчилари Олий Мажлис Сенати ва Маданият вазирлиги ҳузуридаги маданият ва санъатни ривожлаштириш жамғармаси бўлиб, Сенат раисининг биринчи ўринбосари Содиқ Сафоев, Маданият вазири Бахтиёр Сайфуллаев ва Маданият вазирлиги ҳузуридаги маданият ва санъатни ривожлаштириш жамғармаси директори ўринбосари Гаяне Умерова спикер сифатида иштирок этади.
Тадбир доирасида ҳомийлик маданиятини шакллантириш ва тарғиб қилиш, мавжуд хайрия ва ўзаро ёрдам бериш қадриятларини янада ривожлантириш, бу борада маданият соҳаси мутахассислари, ҳукумат ва бизнес вакиллари, ижодкорлар ва бошқа манфаатдор шахсларни бирлаштириш масалалари кенг муҳокама қилиш режалаштирилган.
Музокаралар давомида мамлакатда хайрия ишларини ривожлантириш учун меъёрий ҳуқуқий таъминот, давлат ва бизнеснинг маданий кўмак фаолият соҳаларини, уларнинг ўзаро муносабатлари ва масъулиятларини янада аниқроқ тақсимлаш, шунингдек, Ўзбекистонда ҳомийлик қилувчиларнинг асосий гуруҳларини аниқлаш масалалари муҳокама қилинади.
Ўзбекистонда ҳомийлик тўғрисидаги қонуннинг қабул қилиниши ҳомийлик иштирокчиларини қайд этиш ва уларни рағбатлаштириш имконини беради. Бундан ташқари, қонун ҳомийлик ёрдамини олувчилар томонидан ҳисобот топшириш механизмини ҳам назарда тутади. Бу ўз навбатда ҳомийлик қилувчи шахсларга уларнинг маблағлари мўлжалланган мақсадларда сарфланаётганлигига ишонч ҳосил қилишларига ёрдам беради.
Изоҳ (0)