Ўзбекистон Адлия вазирлиги томонидан ногиронлиги бўлган шахсларни қўллаб-қувватлашга қаратилган «Биз биргамиз» деб номланган ижтимоий лойиҳа иш бошлади, деб хабар беради ЎзА.
Ижтимоий лойиҳанинг асосий мақсади ногиронлиги бўлган шахслар, хусусан, ногиронлиги бўлган аёлларни ижтимоий ва моддий қўллаб-қувватлашдир.
Лойиҳа доирасида бевосита Адлия вазирлиги кўмагида Korzinka.uz супермаркетлар тармоғи, Ecobozor каби йирик савдо мажмуаларида махсус савдо расталари ташкил этилди. Унда ўз уйларида турган ҳолда турли хилдаги буюмлар, маҳсулотлар тайёрлаш билан шуғулланадиган, бироқ ўз маҳсулотларини реализация қилишда турли қийинчиликларга учраётган ногиронлиги бўлган ишбилармон аёлларнинг тайёрлаган маҳсулотлари сотилади.
Лойиҳанинг дастлабки босқичида 50 нафар ногиронлиги бўлган ишбилармон аёл ўз уйларидан чиқмаган ҳолда иш билан таъминланади.
Мазкур лойиҳа барча ҳудудларда амалга оширилиши режалаштирилган. Хусусан, чекка ҳудудларда истиқомат қилаётган ногиронлиги бўлган аёллар тайёрлайдиган маҳсулотларни сотиш учун ҳудудий адлия органлари томонидан вилоятлар марказларидаги йирик савдо мажмуаларида худди Тошкент шаҳридаги каби махсус савдо расталари ташкил қилинади.
Лойиҳани мунтазам амалга ошириш учун Адлия вазирлиги ҳамда Ecobozor, Korzinka.uz каби йирик савдо мажмуалари раҳбарлари билан узоқ муддатли ҳамкорлик келишувлари имзоланди.
Изоҳ (0)