Бугун,

  • USD 10940.05
  • RUB 182.26
  • EUR 11121.65

ЎзАда журналист Норгул Абдураимованинг Ўзбекистонда валюта айирбошлаш бўйича ҳамон фаолият юритаётган «қора бозор» ҳақидаги мақоласи чоп этилди. Қуйида мақола эътиборингизга ҳавола этилади.

Фото: ЎзА

Фото: ЎзА

Ўзбекистонда валюта айирбошлаш бўйича «қора бозор» ҳамон фаолият юритмоқда. Бошқа давлатларда деярли учрамайдиган, иқисодиётга, фуқаролар манфаатига зид бўлган бу «амалиёт»га барҳам бериш учун кейинги пайтда кўплаб чоралар кўрилди.Валютанинг расмий курси анча юқори бўлса ҳам уни қонуний сотиб олиш ёки алмаштириш имконияти яратилгани, албатта, энг тўғри қарор.

Ахир авваллари ‘қора бозор’дан валюта олишга мажбур бўлган кишилар расмий курс бўйича олганимда шунча маблағ йўқотмасдим, деб изтиробда яшагани сир эмас.

Биз ҳуқуқий давлат барпо этар эканмиз, ҳар бир соҳада қонунийлик таъминланиши шарт. Шундагина эртага ҳуқуқларимиз нафақат кафолатланган, балки таъминланган шароитда яшаймиз. Фарзандларимиз бундан баҳраманд бўлади. Аммо ҳамон кўпчиликнинг онгида тўғри, қонуний йўлдан эмас, эгри йўлдан юриш «туйғуси» сақланиб қолмоқда.

Барча тижорат банкларида валюта айирбошлаш шохобчалари фаолият юритмоқда. Кўпчилик фуқаролар валюта олиш ва уни сўмга алмаштириш операцияларини эркин амалга оширяпди. Валютани нақдлаштириб олиш учун махсус банкоматлар ҳам ўрнатилган.

Айримлар яратилган имкониятдан фойдаланиш ўрнига ҳамон «қора бозор»дан кўнгил узмаётир. Бозорга йўлингиз тушса, валюта сотиб оламан, деб ўтирган эски «валютафуруш»ларга ҳамон кўзимиз тушади. Уларнинг хизматидан воз кеча олмаётганлар ҳам кам эмас.

Бош прокуратура ҳузуридаги солиқ, валютага қарши жиноятларга ва жиноий даромадларни легаллаштиришга қарши курашиш департаменти томонидан бундай ҳолларга барҳам беришга қаратилган чора-тадбирлар давом эттирилмоқда. Бош прокуратура матбуот хизмати хабарига кўра, департаментнинг Чилонзор тумани бўлими ходимлари томонидан ўтказилган тезкор тадбирда фуқаролар Ш.,Ғ. ва Ж.лар ўзаро олдиндан тил бириктириб, ҳар бир АҚШ долларини «қора-бозор» нархида 8150 сўмдан ҳисоблаб, 27 минг АҚШ долларини ноқонуний даромад орттириш мақсадида 220 миллион сўмга сотаётган вақтда ашёвий далиллар билан ушланган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Албатта, бу фош этилган биргина ҳолат. Лекин ён-атрофимизда бундай ноқонуний ишлар тез-тез содир бўлаётгани сир эмас. Одамлар эса бунга ҳамон бефарқ қарамоқда. Ҳар бир фуқаро бу борада қонуний йўл сари интилса, валюта айирбошлаш билан боғлиқ қонун бузилишларнинг олдини олишда ўз ҳиссасини қўшган бўларди.

Зеро, валюта бозорини эркинлаштириш сиёсати туфайли доллар расмий курсининг пасая бошлагани кузатилгани кўз ўнгимизда рўй бермоқда. Бу ислоҳот бўлмаганида ҳозир «қора бозор»да 100 доллар аллақачон 1 миллион сўмга чиққан бўларди. Меҳнат қилиб топаётган даромадимиз «қора бозор» карчалонларининг чўнтагига оқиб кетарди.

Изоҳ
Асосий янгиликлар