“UzKor Economy” jurnalida Janubiy Koreya tadbirkorlarining Farg‘onaga tashrifi haqida maqola chop etildi

Janubiy Koreyada nashr etiladigan “UzKor Economy” haftalik jurnalining 2018-yil aprel oyi sonlaridan birida Janubiy Koreya ishbilarmon doiralarining Farg‘ona viloyatiga tashrifi, Farg‘ona shahrida o‘tkazilgan katta iqtisodiy biznes forumi, “Qo‘qon” erkin iqtisodiy zonasidagi sharoitlar hamda viloyatning investitsion salohiyati haqida maqola chop etildi. Bu haqda “Daryo” muxbiri Azizjon Ermatov xabar berdi.

Mazkur maqola Janubiy Koreyaning Evergreen Motors Group kompaniya raisi Kim Chang Kyon boshchiligidagi biznes-delegatsiya vakillarining joriy yil 5—6-mart kunlari Farg‘ona viloyatiga qilgan tashrifi yakunlari bo‘yicha tayyorlangan.

Farg‘onada o‘tgan Koreya Respublikasi ishbilarmonlari biznes forumida jahon miqyosida tilga tushgan Hyundai, KIA, Daewoo kabi korporatsiyalar, Cheonnam National University Hospital tibbiyot markazi, Seojeong University oliy ta’lim maskani, KDB bank muassasasi, Hankook Suward CO. LTD santexnika mahsulotlari ishlab chiqarish zavodi o‘rtasida qo‘shma korxonalar tashkil etish, ta’lim, tibbiyotda hamkorlik qilish bo‘yicha shartnomalar imzolangan edi.

Maqolada xorijlik tadbirkorlar ikki kun davomida Farg‘ona viloyatining iqtisodiy, investitsion, turistik salohiyati va boshqa sohalar bilan tanishganliklari, viloyatda tashkil etilayotgan “Qo‘qon” erkin iqtisodiy zonasi, Indorama Kokand texstile qo‘shma korxonasida biznes uchun yaratilgan sharoit ularda katta taassurot uyg‘otganligi yoziladi.

Shuningdek, viloyat hokimining respublikada, jumladan, Farg‘ona viloyatida investitsion iqlimni o‘rganish, hamkorlik qilish uchun barcha eshiklar keng ochiq, uchrashuv va hamkorliklar nafaqat iqtisodiyot sohasida, balki ta’lim, ilm va madaniyat sohalarida ham ikki xalqning yaqinlashuvida yangi pog‘ona bo‘ladi, degan fikrlari Janubiy Koreya jamoatchiligida keng muhokama qilinayotgani ta’kidlangan.

Viloyat hokimligidan olingan ma’lumotga ko‘ra, 2017-yilda farg‘onalik ishbilarmonlarning Koreya Respublikasi bilan tashqi savdo aylanmasi hajmi 79 million AQSh dollarini, shundan, eksport 37,4 million, import 41,7 million AQSh dollarini tashkil etgan. Bugungi kunda viloyatda Janubiy Koreya bilan hamkorlikda 18 ta xorijiy investitsiyali korxonalar faoliyat ko‘rsatmoqda.