Наманган вилоятининг Норин тумани ҳокимлигида бўлиб ўтаётган видеоселектор йиғилишида Президент Шавкат Мирзиёев вилоятда аҳоли бандлиги масалаларига алоҳида тўхталди. Бу ҳақда «Дарё» мухбири хабар бермоқда.
— Вилоятда ишсизлар сони 58 минг киши эканлиги айтилмоқда. Аслида бундан тўрт-беш баробар кўп, буни яхши биламан. Шунинг учун Наманганда аҳолини иш билан таъминлаш асосий вазифага айланиши керак. Бунда айниқса ипакчилик, чорвачилик, паррандачилик ва балиқчиликка эътибор қаратиш зарур, — таъкидлади давлат раҳбари.
Шавкат Мирзиёев Наманган бир пайтлар ўзининг атласи, шойиси билан машҳур бўлганини эслатди. Вилоятда ипакчиликни янада ривожлантириш, соҳага инвестициялар жалб этиш, бунинг ортидан минглаб фуқарони иш билан таъминлаш мумкинлигига эътибор қаратилди. «Ўзбекипаксаноат» уюшмаси бошқарув раиси Баҳром Шариповга бу борада аниқ топшириқлар берилди.
Вилоят, хусусан, Учқўрғон ва Норин туманларининг балиқчилик соҳасидаги имкониятларидан етарлича фойдаланилмаётгани билдирилди. Бунинг учун вилоятда балиқчиликка ихтисослашган махсус институт ташкил этиш, Учқўрғондаги коллежлардан бирини балиқчиликка йўналтириш, қўшимча ҳовузлар қуриш, ноёб балиқлар етиштиришни йўлга қўйиш юзасидан мутасаддиларга вазифалар юклатилди.
Изоҳ (0)