«Бавария»ни Чемпионлар Лигаси финалидан маҳрум қилган Зиданнинг «Реал»и яна рекорд қўйди

Кеча, 1 май санасида Зинедин Зидан бошчилигидаги «Реал» Мюнхеннинг «Бавария»сини икки ўйин натижасига кўра мағлуб этиб, Европа Чемпионлар Лигаси финалига йўл олди.

Шу тариқа мадридликлар мазкур мусобақа финалига кетма-кет 3 марта чиқишга муваффақ бўлди. Бундан аввалги қаторасига 2 мавсумда ҳам «Реал» мусобақанинг финалига чиқиб, унда ғолиб бўлганди.

Аввал бундай натижага фақат Италиянинг икки гранди – «Ювентус» ва «Милан» эришганди, холос. Турин клуби мусобақанинг 1996, 1997 ва 1998 йиллардаги, Милан жамоаси эса 1993, 1994 ва 1995 йиллардаги финалларида қатнашганди.

Таъкидлаш жоиз, «Ювентус» ва «Милан» ўзлари иштирок этган финаллардан фақат биттасида ғолиб бўла олган, холос («Ювентус» 1996 йилда ва «Милан» 1994 йилда).

Шунингдек, «Реал» Европа Чемпионлар Лигаси (мусобақа шу ном билан атала бошлангандан бери) финалига 7 марта чиқа олди ва бу кўрсаткич бўйича рекордчига айланди. Мадрид клуби 1998, 2000, 2002, 2014, 2016, 2017 йилларда финалда ўйнаган ва уларнинг барчасида ғолиб бўлган. Бу борада ундан кейинги ўринларда яна «Ювентус» ва «Милан» бормоқда. Италян клублари мусобақанинг финалига 6 мартадан чиқишга эришган.

«Ювентус» мусобақанинг 1996, 1997, 1998, 2003, 2015, 2017 йилги финалларида иштирок этиб, юқорида таъкидланганидек, фақат битта финалда – 1996 йилда ғолиб бўлган. «Милан» эса мусобақанинг 1993, 1994, 1995, 2003, 2005, 2007 йиллар мавсумидаги финалларида иштирок этиб, 3 марта ғолиб бўлган (1994, 2003, 2007 йиллар).

«Реал» бугун, 2 май санасида «Рома» — «Ливерпуль» учрашувидан сўнг финалдаги рақибини билиб олади. Финал учрашуви эса Киевдаги «Олимпийский» стадионида 26 май санасида бўлиб ўтиши белгиланган.