Тошкентда саккиз қаватли бино 15 млрд сўмлик бошланғич нарх билан кимошди савдосига қўйилди

Тошкент марказидаги саккиз қаватли бино 15 миллиард сўмга аукционга қўйилди, деб ёзади Spot E-ijro auksion маълумотларига таяниб.

Бинода 119 та хона бор. Умумий ер майдони — 0,5 га, иморат майдони — 0,1 га. Бинонинг умумий майдони — 5,2 минг кв. м, шундан 4,5 минг кв. м фойдали майдондир.

Ижро ҳужжатининг санаси сифатида 2017 йил октябрь, ижро этувчи сифатида эса Миробод тумани Мажбурий ижро бюроси кўрсатилган.

Лот ҳақидаги маълумотларда манзил дея Миробод тумани Мажбурий ижро бюроси жойлашган жой келтирилган. Аммо эълон қилинган суратларга кўра, бино Ислом Каримов кўчаси, 16А-уй манзилида жойлашган, дейилади хабарда.

Объектнинг бошланғич нархи — 15 миллиард сўм, закалат пули миқдори — 750 миллион сўм. Аризалар 15 майгача қабул қилинади. Аукционнинг ўзи 17 майда бўлиб ўтади.