Жанубий Кореянинг Evergreen motors, Korean Consortium partners (Hyundai Motor) ва Posco Daewoo компаниялари билан ҳамкорликда Ўзбекистонда Hyundai автобуслари, юк ва йўловчи ташишга мўлжалланган микроавтобуслар, юк автомобиллари ҳамда бошқа махсус автоуловлар ишлаб чиқарилади. Бу ҳақда «Дарё» мухбири Азизжон Эрматов хабар берди.
Йилига 3000 дона автоулов ишлаб чиқарилиши кўзда тутилган корхона Фарғона вилоятининг Учкўприк туманида – «Қўқон» эркин иқтисодий зонасида қурилади. Лойиҳанинг бошланғич қиймати 130 миллион долларни ташкил этади. Ишлаб чиқарилган маҳсулотларнинг камида 40 фоизи экспорт қилинади. 2019 йилда 150 та , 2020 йилда эса яна 400 та доимий иш ўрни яратилади. Maxсус техникаларнинг аксарияти метан газига мослаштирилади.
«Жанубий Корея компаниялари билан ҳамкорликда яна бир лойиҳа амалга оширилади – иқтисодий зонада Hyundai юккўтаргичлари ишлаб чиқарилади. Бунинг учун дастлабки босқичда 10 миллион доллар инвестиция жалб қилинади. 1–2 тонна ҳажмга мўлжалланган юккўтаргичлар электр қувватида, 2,5—7 тонна ҳажмга мўлжалланган юккўтаргичлар дизел ёқилғисида ишлайди. Лойиҳа тўла қувватда йўлга қўйилгач, 150 нафар мутахассис иш билан таъминланади,» – дейди Учкўприк тумани ҳокимининг ўринбосари Нурматжон Комилов.
Бугунги кунда Ўзбекистонда Жанубий Корея сармояси иштирокида тузилган 460 дан ортиқ корхона фаолият юритмоқда. Мамлакатда Кореянинг 75 компанияси ўз ваколатхонасига эга. Кореянинг Ўзбекистон иқтисодиётига жалб этилган инвестициялари ҳажми 7 миллиард доллардан ошади.
Изоҳ (0)