АҚШнинг изланишлар маркази ўтказган тадқиқотга кўра, Ўзбекистон озиқ-овқат хавфсизлиги рейтингида дунёда 64-ўринни эгаллади. Бу ҳақда Миллий матбуот марказида «Ўзстандарт» агентлиги томонидан республикада озиқ-овқат маҳсулотларининг хавфсизлигини таъминлаш борасида олиб борилаётган ишлар ҳақида ташкил этилган матбуот анжуманида хабар берилди.
Бир йил олдин Ўзбекистон рейтингда 75-ўринда эди. Ўзбекистонда озиқ-овқат хавфсизлигини мустаҳкамлаш борасида самарали ишлар олиб борилаётганлиги сабабли, мамлакат йилдан йилга дунё рейтингида юқорилаб бормоқда, дейилади хабарда.
Бу борада «Ўзстандарт» агентлиги, «Республика синов ва сертификатлаштириш маркази» давлат корхонаси томонидан ҳам амалий ишлар олиб борилмоқда, жумладан лабораторияларнинг моддий техник базаларини модернизация қилиш, замонавий ускуналар билан таъминлаш ҳамда халқаро стандартларни амалиётга жорий этиш ишлари амалга оширилмоқда.
Корхона қошидаги халқаро талабларга жавоб берадиган, замонавий жиҳозланган Кимё-биология лабораторияси озиқ-овқат ва қишлоқ хўжалиги маҳсулотларини синаш ҳамда уларнинг сифат кўрсаткичларини аниқлашга ихтисослаштирилди. Лабораториянинг аккредитация доираси, маҳсулотларни синаш бўйича 770 та (шундан 30 та халқаро ISO стандартлари) синов услубларига кенгайтирилди.
Изоҳ (0)