Бухорода 85 километр йўл қайтадан қурилди (фото)
«Ғузор—Нукус—Қўнғирот—Бейнов» автомобиль йўлининг Бухоро вилоятидаги Ромитан, Жондор ва Пешку туманлари ҳудудларидан ўтувчи 85 километрли қисмини 2 тасмали асфальт-бетон қопламали йўлдан 4 тасмали цемент-бетон қопламали автомобиль йўлига ўтказиш лойиҳаси тўлиқ якунланди. Бу ҳақда Автомобиль йўллари давлат қўмитаси матбуот хизмати хабар бермоқда.
А-380 автомобиль йўли халқаро Е-40 халқаро транспорт йўналишининг Ўзбекистондаги қисми ҳисобланиб, у орқали Марказий ва Шарқий Европа, Россия, Украина ва Қозоғистонга чиқиш таъминланиб, Ўзбекистон орқали транс-афғон транспорт йўналишига боғланади.
Ушбу автомагистраль Қорақалпоғистон Республикаси, Хоразм, Бухоро ва Қашқадарё вилоятлари ҳудудидан ўтиб, давлатлараро, вилоятлараро алоқаларни таъминлашда ҳам муҳим бўғин ҳисобланади.
Автомагистраль ўз навбатида халқаро аҳамиятдаги М-37 «Самарқанд-Бухоро-Олот» ва M-39 «Олмаота-Тошкент-Термиз» автомобиль йўлларини боғлайдиган муҳим халқаро йўналиш бўлиб, транс-афғон транспорт йўналишининг шимолий таркибий қисми ҳам ҳисобланади.
Мазкур лойиҳанинг умумий қиймати 175,2 миллион долларни ташкил этиб, ушбу ишларни амалга ошириш учун бош пудратчи ташкилот этиб Жанубий Кореянинг Posco Engineering & Construction компанияси белгиланди.
Ушбу ишларни бажаришда 400 донадан ортиқ йўл қурилиш техникаси жалб қилинди. Қурилиш давомида 600 га яқин маҳаллий мутахассислар ва ишчилар тун-у кун меҳнат қилди.
Давлат қабул комиссияси томонидан имзоланган объектни фойдаланишга топшириш далолатномаси тасдиқланди. Йўлнинг мазкур қисми транспорт ва йўловчилар қатнови учун расман очилди. Бугунги кунда мазкур йўл жаҳон андозаларига тўлиқ жавоб беради ва цемент қопламага эга.
Мазкур лойиҳанинг тўлиқ амалга оширилиши натижасида транспорт харажатлари миқдори пасайтирилади, маҳаллий ва халқаро транзит ташишларнинг вақти қисқартирилади ҳамда хавфсиз автомобиль йўллари тармоғи барпо этилади.
