Таъсисчиларидан бири Россия президенти Владимир Путиннинг қизи деб тахмин этиладиган Катерина Тихонова бўлган, талабалар, аспирантлар ва ёш олимларнинг илмий-лойиҳавий фаолиятини қўллаб-қувватловчи «Миллий интеллектуал тараққиёт» фонди ўз тарихидаги рекорд даражали харажатлари ҳақида ҳисобот берди, деб ёзади «МБК Медиа».
Расмий ҳисоботга кўра, 2017 йилда фонд 704 миллион рубль сарф қилган. Ушбу маблағнинг ярмидан кўпини алоҳида шахслар ёки хусусий ташкилотлардан олинган пуллар ташкил қилди. Маблағнинг асосий қисми «мақсадли тадбирлар»га харжланган.
Таъкидланишича, фонд яратилганидан буён унинг сарф-харажатлари йилдан йилга ошиб бормоқда.
Катерина Тихонова — Bloomberg ва Reuters маълумотларига кўра, Владимир Путиннинг қизи. АҚШ молия вазирлиги ҳам янги санкциялар ҳақида эълон қилаётиб Тихоновани Россия етакчисининг қизи деб атади. Аммо Путиннинг ўзи оиласи аъзолари ҳақида ҳеч қачон омма олдида ошкора гапирмаган.
Аввалроқ Bloomberg ўз манбаларига таяниб, Катерина Тихонова ва «Сибур» нефть-кимё компанияси директорлар кенгаши аъзоси Кирилл Шамалов ажрашгани ҳақида хабар берган эди.
Изоҳ (0)