Ўзбек қиличбози Жаҳон чемпионатида 38-ўринни қўлга киритди

Италиянинг Верона шаҳрида қиличбозлик бўйича ёшлар ва кадетлар ўртасида Жаҳон чемпионати бўлиб ўтмоқда.

МОҚ хабарига кўра, Буэнос-Айресдаги III ёзги ўсмирлар Олимпия ўйинларига йўлланма берувчи ушбу нуфузли мусобақада ўзбекистонлик ёш қиличбозлар ҳам иштирок этмоқда.

Чемпионатда шамшир йўналишида Ўзбекистон шарафини ҳимоя қилган Файзулла Алимов мусобақадаги чиқишини якунлади. У яккалик баҳсларида қатнашиб, 205 нафар спортчи орасида 38-натижани қайд этди.

Ўзбекистонлик қиличбозлар энди рапира ва қилич йўналишларида ўз омадларини синаб кўради. Эртага, 4 апрель куни қилич йўналиши бўйича ёшлар ўртасидаги мусобақада Айсулу Уснатдинова баҳсларга киришади. 5 апрель куни кадетлар ўртасида қилич йўналишида беллашувлар старт олади. Унда Зайнаб Дайибекова, Севинч Исмоилова, Шерзод Мамутов, Жалолиддин Душамбоев ва Пазилбек Генжебаевлар қиличбозлик йўлакчасида ўз маҳоратларини намойиш этадил.

Эртасига улар жамоавий баҳсларда совринли ўринлар учун кураш олиб боради. 7 апрель куни эса ўзбекистонлик рапирачи Умида Илёсова ёшлар ўртасидаги беллашувларда қатнашади.