Бугун,

  • USD 11095.31
  • RUB 173.84
  • EUR 10772.44

«Тошкент савдо маркази» (собиқ «Абу Сахий» бозори) ҳудудида 28 март куни бир гуруҳ мухбирлар журналистик фаолиятини амалга ошириш чоғида бозор маъмурияти ходимлари томонидан тўсқинликка учради, дея хабар бермоқда «Kun.uz» нашри.

Фото: «Дарё» / Дилшод Шарипов

Фото: «Дарё» / Дилшод Шарипов

Хабар беришларича, «Kun.uz» журналисти, ижодий гуруҳ бошлиғи Хуршид Далиев, таҳририят юристи Зафарбек Солижонов ва тасвирчиси Фазлиддин Абдуқодиров таҳририятга фуқаролардан келиб тушган мурожаат юзасидан ўрганиш олиб бориш учун 28 март куни «Тошкент савдо маркази» бозор комплексига ташриф буюрган.

Бозор маъмуриятининг Рустам исмли ходими «Kun.uz» тасвирчисидан камерани тортиб олиб, камера хотирасида мавжуд барча тасвирни ўзбошимчалик билан ўчириб ташлаган. Шунингдек, хизмат гувоҳномасини кўрсатган таҳририят ходимларини мажбурий равишда бозор маъмурияти биносига киришга ундаган.

Хизмат вазифасида бўлган мухбирлар бозор маъмуриятига қарашли бинода жисмоний ва руҳий тазйиқларга учраган.

Ушбу ҳолатда бозор маъмурияти ходимлари ва мухбирлар ўтирган хонага ички ишлар ходимлари (ҳудуд инспектори бўлиши мумкин) кириб келиб, вазиятга ҳеч қандай муносабат билдирмади.

Бундан ташқари, Тоҳир исмли шахс мухбирларни ноқонуний тинтувдан ўтказди.

«Kun.uz» хабаридан

Журналист Далиевнинг таъкидлашича, камера ва диктофон хотирасидан ўчириб ташланган ёзувларда тадбиркор билан суҳбат жараёни бор эди. Мухбирларнинг айтишича, бозор маъмурияти савдо комплекси хусусий мулк эканлигини таъкидлаб, бу ҳудудда суратга олиш мумкин эмаслигини билдирган.

«Бу бозорнинг Ўзбекистондаги ижтимоий ва иқтисодий аҳамиятидан келиб чиқиб, жамоатчилик назорати ва соф журналистик тамойилларга асосланган ҳолда иш олиб бораётган мухбирлар гуруҳи бозор маъмурияти билан суҳбатлашишни ҳам режалаштирган эди», — дейилади «Kun.uz» хабарида.

«Тошкент савдо маркази» маъмурияти ҳозирча бу ҳолат юзасидан бирор изоҳ ё баёнот берганича йўқ.

Аввалроқ «Ўзбекистон 24» телеканалининг «Ахборот 24» дастурида собиқ «Абу Сахий» бозори хорижлик янги инвестор қўлига ўтиб, номи «Тошкент савдо маркази» бўлиб ўзгаргач, тиним билмай ривожланаётгани, бундан сотувчи ва харидорлар беҳад мамнунлиги ҳақида репортаж берилган эди. Репортажда мақталган чет эллик инвесторнинг кимлиги маълум қилинмаган эди.

Қайд этиш жоиз, бу жорий ҳафтада Ўзбекистонда журналистларга турли кўринишда босим ўтказилиши билан боғлиқ биринчи ҳолат эмас. Аввалроқ самарқандлик таниқли журналист Каримберди Тўрамурод Президент ташрифи арафасида ЙТҲ оқибатида ҳалок бўлган каттақўрғонлик 23 ёшли ўқитувчи Диана Еникеева ўлими юзасидан олиб борган суриштирувлари сабаб таҳдид ва пўписалар остида қолганини маълум қилган эди. Кейинроқ бу ҳолат Ўзбекистон прокуратура органлари томонидан назоратга олингани билдирилди.

Изоҳ
Асосий янгиликлар
Спорт
Неймар Бразилиянинг ЖЧ—2022 1/8 финалдаги ўйинини ҳам ўтказиб юбориши мумкин
Дунё
Эдвард Сноуден қасамёд қилиб, Россия паспортини қабул қилиб олди
Спорт
«Зенит» — «Спартак» ўйинидаги оммавий муштлашув иштирокчилари жазоланди