Олий Мажлис Сенатининг XIV ялпи мажлисида 13 та янги қонун қабул қилинади

Бугун, 29 март куни Ўзбекистон Республикаси Олий Мажлис Сенатининг XIV ялпи мажлиси бошланди. Бу ҳақда «Дарё» мухбири Севара Нишонова хабар бермоқда.

Мажлис кун тартибидан қатор муҳим қарорлар муҳокамаси ўрин олган. Хусусан, унда 13 та қонун қабул қилиниши кутилмоқда.

«Тўй-ҳашамлар, оилавий тантаналар маърака ва маросимлар марҳумларнинг хотирасига бағишланган тадбирлар ўтказилишини тартибга солиш тўғрисида», «Ўзбекистон Республикаси Олий суди таркибига ўзгартиришлар киритиш тўғрисида», «Ўзбекистон Республикаси, Қозоғистон Республикаси ва Туркманистон ўртасида уч давлатнинг Давлат чегаралари туташган нуқтаси ҳудуди тўғрисидаги Шартномани (Самарқанд, 2017 йил 10 ноябрь) ратификация қилиш ҳақидаги», «Ўзбекистон Республикаси Давлат хавфсизлик хизмати тўғрисидаги, «Ўзбекистон Республикаси билан Афғонистон Ислом Республикаси ўртасида фуқаролик, оилавий ва жиноий ишлар бўйича ўзаро ҳуқуқий ёрдам тўғрисидаги Шартномани (Тошкент, 2017 йил 5 декабрь) ратификация қилиш ҳақидаги, «Ўзбекистон Республикаси уй-жой коммунал хизмат кўрсатиш соҳаси ходимлари кунини белгилаш тўғрисида»ги каби қонунлари қабул қилиниши режалаштирилган.

Шунингдек, мажлисда Ўзбекистон Республикаси Олий Мажлиси Инсон ҳуқуқлари бўйича вакилининг (омбудсман) 2017 йилдаги фаолияти тўғрисидаги, Марказий банк бошқарув раисининг, Марказий банкнинг 2017 йилдаги фаолияти тўғрисидаги ҳисоботи ҳамда Адлия вазирининг 2017 йилда ҳуқуқий тарғибот ва маърифатнинг ҳолати ҳақидаги ахбороти тингланади.