Ўзбекистон Президентининг «Банк хизматлари оммабоплигини ошириш бўйича қўшимча чора-тадбирлар тўғрисида»ги қарори қабул қилингани ҳақида аввалроқ хабар берилганди. Қарорда келтирилишича, Ўзбекистонда 1 апрелдан халқаро тўлов карталаридаги хориж валютасини нақд шаклда ечиб олиш мумкин бўлади.
Қарорга кўра, Марказий банкка 2018 йил 1 апрелга қадар Ўзбекистон ҳудудида жисмоний шахслар томонидан халқаро тўлов карталарига сотиб олинган хорижий валютани тижорат банклари томонидан белгиланган лимитлар доирасида нақд шаклда ечиб олиш механизмини жорий этиш вазифаси топширилди.
Бундан ташқари, хорижий валютанинг олди-сотди операцияларини амалга ошириш ва халқаро тўлов карталаридан пул маблағларини хорижий ва миллий валютадаги муддатли омонатларга ўтказишни таъминловчи жисмоний шахсларнинг ҳисобварақларини масофадан туриб бошқариш тизими жорий этилиши лозим. Бу онлайн режимда сўмни бошқа хорижий валютага конвертация қилиш имконини беради.
1 ноябрга қадар эса туристлар кўпроқ борадиган жойларда кун-у тун режимда ишловчи автоматлаштирилган валюта айирбошлаш шохобчалари ташкил этилади.
Изоҳ (0)