Эртага Ўзбекистон — Кения ўйини. Кенияликлар мураббийи эса «андижонча» меҳмондўстликдан ҳайратда

Эртага, 23 март жума куни Андижонда Ўзбекистон ҳамда Кения олимпия терма жамоалари ўзаро ўртоқлик учрашувида майдонга тушади. Кения олимпия терма жамоаси бош мураббийи Фрэнсис Киманзи Ўзбекистонга ташриф буюрганидан кейин илк таассуротлари билан бўлишди, деб хабар беради ЎФА.

Ўзбекистонга биринчи марта келишимиз. Бу ердаги одамлар меҳрибон ва меҳмондўст экан. Бизни бу қадар катта тантаналар билан кутиб олишларини ҳатто тасаввур ҳам қилмагандик. Албатта, маҳаллий ишқибозларнинг жамоамизга бўлган илиқ муносабатидан жуда хурсандмиз.

Барча инсонларнинг юзида табассум. Ҳаммада хурсандчилик, кайфият юқори даражада. Табиийки, бизда ҳам кайфият жуда яхши. Осиё чемпиони бўлган Ўзбекистон олимпия терма жамоасига қарши ўйнаш биз учун шараф.

Ўзбекистон ҳамда Кения олимпия терма жамоалари ўртасидаги ўйин аввало халқлар ўртасидаги дўстликнинг ўрнатилишига муҳим туртки бўлади. Бизнинг рақибимиз жуда кучли. Ўзбекистон бежизга Осиё чемпиони бўлгани йўқ. Лекин мана шундай тарих яратган жамоага қарши тўп суриш биз учун жуда қизиқарли ва фойдали бўлишига шубҳа қилмайман.

Фрэнсис Киманзи, Кения олимпия терма жамоаси бош мураббийи

Ўзбекистонга, жумладан, Андижонга биринчи марта ташриф буюрдик. Бизни шу даражада шодиёна билан кутиб олишганидан жуда хурсандмиз. Агар мухлисларнинг кўплигини кўриб ҳайратландим, десам алдамаган бўламан. Айни пайтда қандай ҳиссиётларга берилганимни оддий сўз билан таърифлаш қийин. Ҳаммасига қойил, барчага раҳмат. Сизларга омад тилайман.

Тўғриси, бунгача Ўзбекистон футболи ҳақида етарли маълумотларга эга эмасдик. Аммо Ўзбекистон ОTЖ Осиё чемпиони бўлганидан кейин жамоангиз ҳақида янада кўпроқ маълумотларни билиб олдик. Бундан кейин ҳам Ўзбекистон терма жамоасига омад тилайман.

Биз бу ерга шунчаки келганимиз йўқ. Найробига ғалаба билан қайтмоқчимиз. Мақсадимиз Ўзбекистон билан ўйинларда муваффақият қозонишдир. Андижон шаҳри ҳақида тўхталиб ўтадиган бўлсам, жуда гўзал, жуда чиройли шаҳар экан. Андижон менга ёқиб қолди. Африкадан Андижонга аланганли салом.

Ожванг Тимоти Одхиамбо, Кения олимпия терма жамоаси сардори