Ўзбекистонда бозорлар, савдо мажмуалари ва бошқа объектлардаги барча автотураргоҳларда I ва II гуруҳ ногиронлиги бўлган шахслар машиналари тўхтаб туриши учун жойлар ажратилади. Бу ҳукуматнинг «Ногиронлиги бўлган шахсларнинг автотранспорт воситаларидан фойдаланиши учун қулай шароитлар яратиш чора-тадбирлари тўғрисида»ги қарорида кўзда тутилган, деб ёзади «Газета.uz».
Ногиронлиги бўлган шахсларнинг транспорти учун жой тураргоҳ умумий майдонининг камида 5 фоизини банд қилиши ва тураргоҳнинг кириш ва чиқиш учун қулай бўлган қисмларида жойлашиши керак. I ва II гуруҳ ногиронлиги бўлган шахсларнинг машиналари учун ажратилган жойлар «5.15. Автотураргоҳ жойи» ва «7.17. Ногиронлар» йўл белгилари билан белгиланади.
Қарорга мувофиқ, тураргоҳдан фойдаланиш I ва II гуруҳ ногиронлиги бўлган шахслар учун бепул бўлади, бунда машина ногиронлиги бўлган шахс томонидан бошқарилаётганини билдирувчи белги ва ногиронликни тасдиқловчи гувоҳнома бўлиши керак.
Автотураргоҳлардан 16 ёшгача бўлган ногиронлиги бўлган шахснинг ота-онаси ҳам бепул фойдаланиши мумкин, бунда тегишли нафақа гувоҳномаси бўлиши керак.
Ногиронлиги бўлган шахсларнинг автотранспорт воситалари тўхташи учун мўлжалланган жойлардан бошқа шахслар фойдалангани учун жавобгарлик жорий қилиш режалаштирилмоқда.
Изоҳ (0)