Facebook’даги «Водители Ташкента (Drivers.uz)» гуруҳида 25 февраль куни Тошкент кўчалари бўйлаб ҳаракатланиб, «йўл ҳаракати хавфсизлигига қасддан таҳдид солган» тўй кортежининг видеоси эълон қилинган эди.
Тошкент шаҳар ИИББ матбуот хизмати томонидан 27 февраль куни берилган баёнотга кўра, шаҳар Йўл ҳаракати хавфсизлиги бошқармаси томонидан ҳуқуқбузарлик содир этган ҳайдовчиларни аниқлаш учун қидирув ишлари амалга оширилган.
Натижада йўл ҳаракати қоидабузарлиги Mercedes-Benz, Saturn Sky ва тўртта Range Rover автомобиллари томонидан содир этилгани аниқланган. Машиналарнинг ҳайдовчиларга нисбатан маъмурий ҳуқуқбузарлик тўғрисидаги баённомалар тузилган.
ИИББ матбуот хизматининг қайд этишича, Маъмурий жавобгарлик тўғрисидаги кодекснинг 129-моддасига мувофиқ, мотоцикллар ва бошқа транспорт воситалари хайдовчиларининг йўлларда йўл ҳаракати хавфсизлигига таҳдид солувчи ёки авария ҳолатини келтириб чиқарувчи гуруҳ бўлиб ҳаракат қилишда қатнашиши энг кам иш ҳақининг уч баравари (27 февраль ҳолатига кўра — 516 720 сўм) миқдорида жарима солишга сабаб бўлади.
Изоҳ (0)