Ўзбекистонда 1 мартдан бошлаб тизимли равишда умумий ўрта таълим мактабларининг 1-синфларини ҳафталик ўқув давомийлиги 5 кун бўлган ўқиш жараёнига ўтказилиши режалаштирилмоқда. Бу ҳақда, ўз манбаларига асосланиб, «Kun.uz» ва «Xabar.uz» нашрлари хабар бермоқда.
Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгашидаги манбанинг билдиришича, Вазирлар Маҳкамасининг 9 февралдаги 11-сонли йиғилиши баёни билан шундай ўзгариш жорий этилмоқда.
Бу йил 1 мартдан 1-синф ўқувчилари беш кунлик ўқиш тартибига ўтказилса, кейинги ўқув йилидан бошлаб 5-синфгача бўлган ўқувчилар ҳам бу жараёнга жалб этилади.
Хабар беришларича, беш кунлик ўқиш жараёнига ўтилиши муносабати билан ота-оналар ва кенг жамоатчилик ўртасида бу борада тарғибот тадбирлари амалга оширилади.
«Тарғибот тадбирлари давомида асосан ота-оналарнинг фарзандлари билан оилавий дам олишларига, оилани жипслаштириш, ота-оналар ва фарзандлар ўртасида меҳр-оқибатни ривожлантириш ҳамда чин маънодаги оилавий анъаналарни вужудга келтириш, маданий тарихий обидаларга бирга саёҳат уюштириш масалаларига алоҳида эътибор қаратилади», — дейилади хабарда.
Изоҳ (0)