Ўзбекистон Президенти Шавкат Мирзиёев Литва президенти Даля Грибаускайтега Литва давлати қайта тикланган кун муносабати билан табрик йўллади. Бу ҳақда Президент матбуот хизмати хабар бермоқда.
Литвада 1990 йилдан бери ҳар йили 16 февраль куни миллий байрам — Литва давлати қайта тикланган кун сифатида кенг нишонланади. 1918 йил 16 февраль куни 20 делегатдан иборат Литва Кенгаши Мустақиллик ҳақидаги баённомани қабул қилган — бу ҳужжат билан мустақил Литва давлати қайта тиклангани эълон қилинган.
1990 йил 11 мартида шу вақтгача СССР таркибида бўлган Литванинг парламенти — Олий Кенгаш 1918 йил 16 февралдаги баённомага асосланиб, мустақил Литва давлатини қайта тиклаш ҳақида қарор қабул қилган. Шундай қилиб, Литва СССР таркибидан ажралиб, ўз мустақиллигини эълон қилган илк республикага айланган.
Изоҳ (0)