Ҳозирги кунда Туркиянинг етакчи олий таълим муассасаларида 800 га яқин ўзбекистонлик талаба таҳсил олмоқда, деб ёзади «Народное слово» газетаси.
Шу кунларда Туркияда таҳсил олаётган ўзбекистонлик ёшлар, Ўзбекистоннинг Анқарадаги элчихонаси ва Истанбулдаги бош консуллик вакиллари иштирокида учрашув бўлиб ўтди.
Учрашув жараёнида талабаларга хориждаги Ўзбекистон фуқароларига ҳуқуқий ёрдам кўрсатиш тўғрисида маълумот берилди.
Шунингдек, талабаларнинг ҳуқуқий онг даражаси ва маданиятини ўстириш мақсадида Туркиядаги ўзбекистонлик талабалар ассоциациясини тузиш ҳақида қарор қабул қилинди.
Бирлашма раҳбари этиб Истанбул университетининг сиёсатшунослик факультети 4-босқич талабаси Маъмуржон Аҳмаджонов сайланди.
Шунингдек, ассоциациянинг бошқа шаҳарлардаги вакиллари ҳам тайинланди.
Бундан ташқари, ташкилот қошида Ўзбекистоннинг Туркиядаги элчихонаси вакиллари, ўзбекистонлик педагоглардан иборат консультатив кенгаш ҳам тузилди.
Ассоциация илмий-тадқиқот ишлари, ижтимоий-гуманитар фаолиятни тарғиб қилиш, Туркиядаги ўзбекистонлик талабалар билан алоқа ўрнатиш, уларга маиший ва бошқа муаммоларни ҳал этишда амалий кўмак бериш билан шуғулланади.
Тизим вакиллари, шунингдек, Туркия ОАВларига Ўзбекистондаги ёшлар ҳаракати фаолияти ҳақидаги мақолалар ҳам тайёрлайди.
Изоҳ (0)