Ўзбекистон Республикаси Биринчи Президенти Ислом Каримов номидаги илмий-маърифий ёдгорлик мажмуасида Ислом Каримов таваллудининг 80 йиллиги ҳамда Қуролли Кучлари ташкил этилганининг 26 йиллигига бағишланган давра суҳбати бўлиб ўтди, деб хабар берди ЎзА.
Мудофаа вазирлиги билан ҳамкорликда ташкил этилган тадбирда Қуролли Кучлар академияси ўқитувчилари, тингловчилар, курсантлар, санъаткорлар қатнашди. Тадбир иштирокчилари Биринчи Президент ҳайкали пойига гуллар қўйди, буюк давлат ва сиёсат арбоби сиймосига ҳурмат бажо келтирди.
Давра суҳбати иштирокчилари Ислом Каримов раҳнамолигида қисқа муддатда мутлақо янги асосда Ўзбекистон Қуролли Кучлари шакллантирилгани, мудофаа тизимининг ташкилий-ҳуқуқий асослари яратилганини таъкидлади.
Ислом Каримов саъй-ҳаракатлари билан Ўзбекистондаги ҳарбий билим юртлари сифат жиҳатдан такомилга етказилди. Уларда республика сарҳадларини ҳимоя қилиш, мустақилликни мустаҳкамлаш, тинчликни сақлашга қодир 30 га яқин йўналишда ҳарбий мутахассислар тайёрлаш тизими йўлга қўйилди. Ҳарбийларга кенг имтиёз ва зарур шароитлар яратилди.
Ўзбекистон Республикаси Биринчи Президенти Ислом Каримов номидаги илмий-маърифий ёдгорлик мажмуаси раҳбари Темир Ширинов тадбир иштирокчиларига мажмуа ҳақида маълумот берди. Таъкидландики, Шавкат Мирзиёевнинг таклифи билан Ислом Каримов фаолият юритган қароргоҳ ёдгорлик мажмуасига айланди. Айни кунда мажмуада 120 дан зиёд ходим меҳнат қилмоқда.
Изоҳ (0)