Сурхондарёда рўйхатдан ўтган «Тафсилот-Пресс» газетаси бош муҳаррири ўринбосари Н.Ашуров Фарғона вилоятидаги халқ таълими ва тиббиёт муассасаларида куз-қиш мавсумига тайёргарлик ҳолати, озиқ-овқат захирасини шакллантириш борасида амалга оширилган ишлар аҳволини ўрганиш мақсадида хизмат сафарига юборилади. Бу ҳақда ЎзА хабар бермоқда.
У Фарғона туманидаги 32 ва 3-мактабгача таълим муассасаларида захира режасида кўрсатилган ҳажмда қишлоқ хўжалиги маҳсулотлари захираси яратилмаганлиги ҳолатини матбуотда ёритмаслик эвазига товламачилик йўли билан 1,5 минг доллар талаб қилган.
Бош прокуратура ҳузуридаги департамент ва Миллий хавфсизлик хизмати ходимлари томонидан 2017 йил 19 декабрь куни ўтказилган тезкор тадбир давомида Н.Ашуров Фарғона шаҳридаги «Дўстлик» меҳмонхонаси ёнида 800 долларни олган вақтда ушланди.
Тезкор тадбир давомида «Дўстлик» меҳмонхонасидаги Н. Ашуров жойлашган хона холислар иштирокида кўздан кечирилганда хизмат гувоҳномаси, ташкилотлар билан тузилган шартномалар, маълумотномалар ва норматив хужжатлар нусхалари ашёвий далил сифатида олинган. Шунингдек, у Фарғона тумани тиббиёт бирлашмаси омборини куз-қиш мавсуми учун асосий турдаги қишлоқ хўжалиги маҳсулотлари захирасини ва бирлашма ошхонасида овқатларни тайёрланиш ҳолатини ўрганиб, тушликка солинган овқатга оз миқдорда гўшт солинганлик ҳолатини матбуотга олиб чиқмаслик эвазига омборчидан 200 долларни талаб қилиб, 100 долларини олганлиги аниқланди.
Ҳуқуқ-тартибот органларининг аниқлашича, «уддабурон» журналист 2017 йил 11 декабрь куни Фарғона вилояти Данғара тумани ҳокимлигига борган. Иқтисод бўлими ходими Давронжон Бегматовга Тошкентдан келганлиги, қишга тайёргарлик, озиқ-овқат захираси яратилганини кўриши кераклигини айтади. Д.Бегматов туман халқ таълими бўлимидан ходим ажратиб, тумандаги 1-ихтисослашган мактаб интернатига юборади. Н.Ашуров ўзини валломатлардек тутиб, «текшириш»ни бошлайди.
Мактаб директори С.Мамажонова меҳнат таътилида эканлиги боис ишда бўлмайди. Шунга ҳам қарамай, журналист унинг хонасига кириб, ҳужжатларни текширган. Бундан хабар топган мактаб директори ишхонасига келиб, кабинетида бир бегона киши унинг иш столида ўтириб, ҳужжатларни текшираётганига гувоҳ бўлади.
С.Мамажонова журналистдан текширув учун асос сўрайди. Камчилик аниқланмаганлиги, бу бўйича ҳуқуқ-тартибот идораларига мурожаат қилишини айтади. Таъмагирлик қилмоқчи бўлган журналистнинг ранги ўзгариб, секингина жуфтакни ростлади. Эртаси куни эса мактаб директорининг қўнғироқларига умуман жавоб бермайди.
Айни кунларда мазкур ҳолат юзасидан «Тафсилот-Пресс» газетаси бош муҳаррири ўринбосари Н.Ашуровга нисбатан Жиноят Кодексининг 165-моддаси 2-қисми «а» банди бўйича жиноят иши қўзғатилиб, тергов-суриштирув ишлари олиб борилмоқда.
Изоҳ (0)