Surxondaryoda ro‘yxatdan o‘tgan “Tafsilot-Press” gazetasi bosh muharriri o‘rinbosari N.Ashurov Farg‘ona viloyatidagi xalq ta’limi va tibbiyot muassasalarida kuz-qish mavsumiga tayyorgarlik holati, oziq-ovqat zaxirasini shakllantirish borasida amalga oshirilgan ishlar ahvolini o‘rganish maqsadida xizmat safariga yuboriladi. Bu haqda O‘zA xabar bermoqda.
U Farg‘ona tumanidagi 32 va 3-maktabgacha ta’lim muassasalarida zaxira rejasida ko‘rsatilgan hajmda qishloq xo‘jaligi mahsulotlari zaxirasi yaratilmaganligi holatini matbuotda yoritmaslik evaziga tovlamachilik yo‘li bilan 1,5 ming dollar talab qilgan.
Bosh prokuratura huzuridagi departament va Milliy xavfsizlik xizmati xodimlari tomonidan 2017-yil 19-dekabr kuni o‘tkazilgan tezkor tadbir davomida N.Ashurov Farg‘ona shahridagi “Do‘stlik” mehmonxonasi yonida 800 dollarni olgan vaqtda ushlandi.
Tezkor tadbir davomida “Do‘stlik” mehmonxonasidagi N. Ashurov joylashgan xona xolislar ishtirokida ko‘zdan kechirilganda xizmat guvohnomasi, tashkilotlar bilan tuzilgan shartnomalar, ma’lumotnomalar va normativ xujjatlar nusxalari ashyoviy dalil sifatida olingan. Shuningdek, u Farg‘ona tumani tibbiyot birlashmasi omborini kuz-qish mavsumi uchun asosiy turdagi qishloq xo‘jaligi mahsulotlari zaxirasini va birlashma oshxonasida ovqatlarni tayyorlanish holatini o‘rganib, tushlikka solingan ovqatga oz miqdorda go‘sht solinganlik holatini matbuotga olib chiqmaslik evaziga omborchidan 200 dollarni talab qilib, 100 dollarini olganligi aniqlandi.
Huquq-tartibot organlarining aniqlashicha, “uddaburon” jurnalist 2017-yil 11-dekabr kuni Farg‘ona viloyati Dang‘ara tumani hokimligiga borgan. Iqtisod bo‘limi xodimi Davronjon Begmatovga Toshkentdan kelganligi, qishga tayyorgarlik, oziq-ovqat zaxirasi yaratilganini ko‘rishi kerakligini aytadi. D.Begmatov tuman xalq ta’limi bo‘limidan xodim ajratib, tumandagi 1-ixtisoslashgan maktab internatiga yuboradi. N.Ashurov o‘zini vallomatlardek tutib, “tekshirish”ni boshlaydi.
Maktab direktori S.Mamajonova mehnat ta’tilida ekanligi bois ishda bo‘lmaydi. Shunga ham qaramay, jurnalist uning xonasiga kirib, hujjatlarni tekshirgan. Bundan xabar topgan maktab direktori ishxonasiga kelib, kabinetida bir begona kishi uning ish stolida o‘tirib, hujjatlarni tekshirayotganiga guvoh bo‘ladi.
S.Mamajonova jurnalistdan tekshiruv uchun asos so‘raydi. Kamchilik aniqlanmaganligi, bu bo‘yicha huquq-tartibot idoralariga murojaat qilishini aytadi. Ta’magirlik qilmoqchi bo‘lgan jurnalistning rangi o‘zgarib, sekingina juftakni rostladi. Ertasi kuni esa maktab direktorining qo‘ng‘iroqlariga umuman javob bermaydi.
Ayni kunlarda mazkur holat yuzasidan “Tafsilot-Press” gazetasi bosh muharriri o‘rinbosari N.Ashurovga nisbatan Jinoyat Kodeksining 165-moddasi 2-qismi “a” bandi bo‘yicha jinoyat ishi qo‘zg‘atilib, tergov-surishtiruv ishlari olib borilmoqda.
Izoh (0)