Тошкентнинг Шайхонтоҳур туманида жойлашган Оливо ресторани олдидан ўғирланган банкомат Учтепа туманидаги Ўрикзор жарига улоқтирилди. Бу ҳақда, Шайхонтоҳур туман ИИБга асосланиб, «Xabar.uz» хабар бермоқда.
Хабар беришларича, гумонланувчилардан бири Шайхонтоҳур туман ички ишлар бошқармаси бошлиғи номига ўз айбига иқрор бўлиб ариза ёзган ва жиноят қандай содир этилганини маълум қилган.
Уч киши 30 декабрь куни тонг соат 5:30 да Olivo ресторани олдидаги банкоматни ўғирлаган ва унинг ичида бўлган 830 минг сўм пулни олган.
Хабарда банкомат айнан қандай турга мансуб (у тўловларни қабул қиладиган инфокиоскми ёки нақд пул чиқариб берувчи банкомат)лигига аниқлик киритилмаган.
«Ускуна Учтепа тумани Ўрикзор жарига ташлаб юборилган. Шериклардан бири ўғирланган пулнинг 240 минг сўмини ўз эҳтиёжи учун ишлатиб юборган», — дейилади хабарда.
Қайд этишларича, ҳозирги вақтда мазкур ҳолат юзасидан тергов ҳаракатлари олиб борилмоқда.
Изоҳ (0)