Ишлаб чиқарувчи корхоналар ва ресторанлар учун табиий газ тарифлари оширилди

Вазирлар Маҳкамасининг 2017 йил 28 декабрдаги 1025-сонли қарорига мувофиқ 1 январдан бошлаб истеъмолчиларнинг айрим тоифаларига табиий газ учун тарифлар оширилди. Бу ҳақда «Ўзтрансгаз» АК матбуот хизматига таяниб, UZ24 хабар берди.

Табиий газ реализация қилишда уларга нисбатан нарх белгилашнинг (1 метр куб газ учун 1000 сўм) алоҳида тартиби белгиланадиган истеъмолчи ташкилотлар рўйхати:

1. Пиширилган ғишт, асфальт ва цемент ишлаб чиқарувчи, энергия жиҳатидан самарали технологиялар ва ускуналарни жорий этган, шунингдек, ёқилғининг муқобил турларидан (кўмирдан), шу жумладан, цемент ишлаб чиқаришнинг «қуруқ усули»дан фойдаланувчи корхоналар;
2. Пиширилган ғишт, цемент, асфальт ишлаб чиқарувчи корхоналар (ушбу илованинг 1-бандида кўрсатилган корхоналар бундан мустасно);
3. Оҳактош ва гипс қазиб олувчи, қайта ишловчи ва ишлаб чиқарувчи корхоналар;
4. Бетон ва темир-бетон буюмлар ишлаб чиқарувчи корхоналар;
5. Иссиқхона ва иссиқхона-парник хўжаликлари;
6. Чинни ва фаянсдан буюмлар ишлаб чиқарувчи корхоналар;
7. Ресторанлар, кафе, тантаналарни ўтказиш объектлари ва бошқа умумий овқатланиш объектлари (меҳмонхоналар ва уларга тегишли бўлган ҳудудда жойлашган объектлар бундан мустасно);
8. Гипс-картон, йўлакбош ва керамика плиталари, брусчаткалар, керамик ва цемент-қум черепицалар, қуруқ қурилиш аралашмалари, шунингдек, қувур буюмлари ишлаб чиқарувчи корхоналар.