Жиноят ишлари бўйича Қоҳира суди Мисрнинг собиқ президенти Муҳаммад Мурсийни уч йилга озодликдан маҳрум этиш ҳақида ҳукм чиқарди. «ТАСС» ахборотига кўра, собиқ президент Миср суд ҳокимиятини ҳақорат қилгани учун шундай жазоланган.
Миср прокуратураси вакилининг сўзларига кўра, Мурсий ва унинг сафдошлари ўз баёнотларида, шунингдек, телевидение ва интернетдаги ижтимоий тармоқлар воситасида мамлакат суд тизими, судьялар ва бутун судлов жараёнини обрўсизлантирувчи ахборотни тарқатган.
Ушбу жиноят иши бўйича Мурсийнинг «Мусулмон биродарлар» ҳаракати бўйича яна 18 тарафдори ҳам судланган бўлиб, улар ҳам уч йилга озодликдан маҳрум этилди.
Муҳаммад Мурсий 2013 йилда Миср президентлигидан ағдарилган, унинг ўрнини мамлакатнинг амалдаги раҳбари Абдулфаттоҳ ас-Сисий эгаллаган. Ҳокимиятдан четлатилгач, Мурсий бир неча бор суд қилинди.
Изоҳ (0)