Андижон шаҳрининг Амир Темур кўчасида Муҳаммад Юсуф номидаги она тили ва адабиётига ихтисослаштирилган мактаб ҳамда шоир бюсти ўрнатилган хиёбон барпо этилди. Бу ҳақда ЎзА хабар бермоқда.
Мактаб ва хиёбон «Азимут строй» МЧЖ қурувчилари томонидан қисқа вақтда бунёд этилди. Қурилиш ва бунёдкорлик ишлари учун 2 миллиард 648 миллион сўмга яқин маблағ сарфланди.
Ўзбекистон Бадиий академияси аъзоси, ҳайкалтарош Шоҳрухбек Ўрозов томонидан яратилган бюст, шунингдек, иккита фаввора, манзарали гул ва дарахт кўчатлари ўтқазилган мазкур хиёбон Андижон шаҳрининг кўркига-кўрк қўшиш билан бирга, ёш ижодкорларни тарбиялайдиган зиё масканига айланади.
«Жорий ўқув йилида мактабимизда 150 га яқин ёш таҳсил олмоқда. Билим даргоҳимизда умумтаълим фанлари билан бирга, адабиёт ва бадиий ижод борасида пухта билим олиш учун зарур шароитлар яратилган», — дейди Муҳаммад Юсуф номидаги она тили ва адабиёти фанини чуқурлаштириб ўқитишга ихтисослаштирилган мактаб директори Ш.Нурматова.
Тадбир иштирокчилари мактабда ташкил этилган Муҳаммад Юсуф музейи, шоир ижодига бағишланган очиқ дарс, адабиёт тўгараги фаолияти билан танишди.