Тошкентнинг «Пахтакор» ва Қаршининг «Насаф» клублари Осиё Чемпионлар Лигасининг гуруҳ босқичига йўл олиш учун саралаш учрашувларида иштирок этиши керак.
ОФК Чемпионлар Лигаси учун Ўзбекистонга 1+2 квотасини раво кўрган бўлиб, гуруҳ босқичига тўғридан-тўғри йўлланма берувчи ягона чиптани Ўзбекистон чемпиони сифатида «Локомотив» ютиб олганди. «Насаф» эса вице-чемпион сифатида саралаш ўйинларида ўйнаши керак эди. Ўзбекистон Кубогида ҳам «Бунёдкор» мағлуб бўлгач, учинчи йўлланма «Пахтакор»га насиб қилди.
Ўзбекистоннинг саралашда ўйнайдиган ҳар икки клуби 30 январь куни майдонга тушади. «Насаф» Қаршида Иорданиянинг «Ал-Файсалий» клубини қабул қилади. «Пахтакор» эса Қатарда «Ал-Гарафа» меҳмони бўлади. 1 тагина ўйиндан иборат саралаш босқичида ғолиб чиққанлар, гуруҳ босқичига йўлланма олади.
«Пахтакор»нинг рақиби Қатар Юлдузлар Лигасининг 10-туридан кейин 7-ўринни эгаллаб турибди. 4 та дуранг ва 4 та мағлубият қайд этган жамоа ўзбекистонлик Темурхўжа Абдухолиқов тўп сурадиган «Ас-Сайлия»дан 8 очко ортда қолиб кетган.
«Насаф»нинг рақиби «Ал-Файсалий» эса Иордания чемпионатининг 11-туридан кейин 4-ўринни эгаллаб турибди. Жамоа ҳисобида 4 та дуранг ва 2 та мағлубият бор.
«Бунёдкор» ўз тарихида илк бор Осиё Чемпионлар Лигасидан четда қолди
Саралашда, шунингдек, «Ал-Айн» (БАА) — «Малкия» (Баҳрайн) ҳамда «Зоб Оҳан» (Эрон) — «Аизавл» (Ҳиндистон) учрашувлари ҳам ўтказилади.