Шу йилнинг июнь ойида Россия ОАВларида шов-шув кўтариб, Англиянинг «Халл Сити» клуби билан шартнома имзолаган Леонид Слуцкий истеъфога чиқарилди. Бу ҳақда клуб матбуот хизмати хабар берди.
Икки томон ўзаро келишиб, ҳамкорликни тўхтатишга қарор қилган. Слуцкий билан биргаликда стратегик директор Олег Яровинский ҳам ўз вазифасидан озод этилган. Чемпионшип Лигада ўйнайдиган «Халл Сити» бу инсонлар бошқарувида Премьер-Лига сари ҳаракат қилиш ўрнига, турнир жадвалида 20-ўринни эгаллаб турибди. Мазкур лигада 24 та жамоа кураш олиб боради.
Слуцкий билан «йўлбарслар» 20 та учрашувда майдонга тушди ва шуларнинг фақатгина 4 тасида зафар қучди. 9 та ўйинда дуранг қайд этилди, 7 тасида мағлубият кузатилди. Россиялик мутахассис бошқарган жамоа кетма-кет 7 та турда зафар қуча олмагач, у ортга қайтадиган бўлди.
«Халл Сити»га қадар Леонид Слуцкий Россия миллий термасини Францияда бўлиб ўтган Евро—2016 беллашувларига олиб борган ва гуруҳни сўнгги ўринда якунлаганди. Россиялик футболчилар илк турда Англия билан 1:1 ҳисобида дуранг ўйнаб, кейин 2 та ўйинни бой берганди: Словакия 1:2 ва Уэльс 0:3.
Изоҳ (0)