Shu yilning iyun oyida Rossiya OAVlarida shov-shuv ko‘tarib, Angliyaning “Xall Siti” klubi bilan shartnoma imzolagan Leonid Slutskiy iste’foga chiqarildi. Bu haqda klub matbuot xizmati xabar berdi.
Ikki tomon o‘zaro kelishib, hamkorlikni to‘xtatishga qaror qilgan. Slutskiy bilan birgalikda strategik direktor Oleg Yarovinskiy ham o‘z vazifasidan ozod etilgan. Chempionship Ligada o‘ynaydigan “Xall Siti” bu insonlar boshqaruvida Premyer-Liga sari harakat qilish o‘rniga, turnir jadvalida 20-o‘rinni egallab turibdi. Mazkur ligada 24 ta jamoa kurash olib boradi.
Slutskiy bilan “yo‘lbarslar” 20 ta uchrashuvda maydonga tushdi va shularning faqatgina 4 tasida zafar quchdi. 9 ta o‘yinda durang qayd etildi, 7 tasida mag‘lubiyat kuzatildi. Rossiyalik mutaxassis boshqargan jamoa ketma-ket 7 ta turda zafar qucha olmagach, u ortga qaytadigan bo‘ldi.
“Xall Siti”ga qadar Leonid Slutskiy Rossiya milliy termasini Fransiyada bo‘lib o‘tgan Yevro—2016 bellashuvlariga olib borgan va guruhni so‘nggi o‘rinda yakunlagandi. Rossiyalik futbolchilar ilk turda Angliya bilan 1:1 hisobida durang o‘ynab, keyin 2 ta o‘yinni boy bergandi: Slovakiya 1:2 va Uels 0:3.
Izoh (0)