2017 йилнинг 22 ноябрида Американинг нуфузли The Hill нашрида «Ўзбекистоннинг ташқи сиёсати — минтақавий сиёсат» сарлавҳаси остида мақола чоп этилди, деб ёзади «Жаҳон» ахборот агентлиги.
Мақолани нашр шарҳловчиси ва Corsair LLC консалтинг компаниясининг бошқарувчи директори Жеймс Дурсо Ўзбекистонга ташрифи ва 10—11 ноябрь кунлари Самарқандда БМТ ҳомийлигида бўлиб ўтган халқаро конференциядаги иштироки якунлари бўйича тайёрлаган.
Мақолада таъкидланишича, Ўзбекистон Президенти Шавкат Мирзиёев жорий йил сентябрь ойида БМТ минбаридан туриб Ўзбекистон бугунги кунда ўзининг ташқи сиёсатида Марказий Осиё минтақасига устувор аҳамият қаратаётганини айтиб, мамлакат ташқи сиёсатидаги бирламчи йўналишларни расман белгилаб берди.
Муаллиф қайд этишича, «Марказий Осиёнинг қолган барча мамлакатлари билан умумий чегараларга эга бўлган ва энг кўп аҳолини ўз ичига олган ҳолда, Ўзбекистоннинг қўшни республикалар билан самарали ҳамкорлик қилишга тайёрлиги минтақанинг янада ривожланишига туртки бериши, бунинг акси эса унинг салоҳиятини музлатиб қўйиши мумкин».
Жеймс Дурсо мақолада «Марказий Осиё мамлакатларининг ўзлари нималарга диққатини қаратиши керак?» — деган саволни кўтариб, бунинг эҳтимолий вариантларидан бири сифатида иқтисодиётни тилга олади. Бунда Шавкат Мирзиёевнинг Марказий Осиё мамлакатларининг самарали ҳамкорлиги келаси ўн йил ичида минтақа ялпи ички маҳсулотини камида икки баравар кўпайтира олиши ҳақидаги гаплари эслатиб ўтилди.
Бошқа бир йўналиш сифатида минтақавий ҳамкорлик тузилмаси қайд этилади.
Мақолага якун ясар экан, муаллиф Марказий Осиё минтақаси савдо, туризм ва маданият марказига айланиб, шунчаки нотаниш географик терминдан каттароқ нарсага айлана олиши мумкинлиги ҳақида хулоса қилди. «Ўзбекистоннинг сўнгги ташаббуслари бошқа мамлакатлар манфаатлари учун хизмат қилмайдиган, балки ўзига тўқ минтақага айланадиган янги Марказий Осиё учун туртки бера олади», — деб ёзди у.
Изоҳ (0)