2017-yilning 22-noyabrida Amerikaning nufuzli The Hill nashrida “O‘zbekistonning tashqi siyosati — mintaqaviy siyosat” sarlavhasi ostida maqola chop etildi, deb yozadi “Jahon” axborot agentligi.
Maqolani nashr sharhlovchisi va Corsair LLC konsalting kompaniyasining boshqaruvchi direktori Jeyms Durso O‘zbekistonga tashrifi va 10—11-noyabr kunlari Samarqandda BMT homiyligida bo‘lib o‘tgan xalqaro konferensiyadagi ishtiroki yakunlari bo‘yicha tayyorlagan.
Maqolada ta’kidlanishicha, O‘zbekiston Prezidenti Shavkat Mirziyoyev joriy yil sentabr oyida BMT minbaridan turib O‘zbekiston bugungi kunda o‘zining tashqi siyosatida Markaziy Osiyo mintaqasiga ustuvor ahamiyat qaratayotganini aytib, mamlakat tashqi siyosatidagi birlamchi yo‘nalishlarni rasman belgilab berdi.
Muallif qayd etishicha, “Markaziy Osiyoning qolgan barcha mamlakatlari bilan umumiy chegaralarga ega bo‘lgan va eng ko‘p aholini o‘z ichiga olgan holda, O‘zbekistonning qo‘shni respublikalar bilan samarali hamkorlik qilishga tayyorligi mintaqaning yanada rivojlanishiga turtki berishi, buning aksi esa uning salohiyatini muzlatib qo‘yishi mumkin”.
Jeyms Durso maqolada “Markaziy Osiyo mamlakatlarining o‘zlari nimalarga diqqatini qaratishi kerak?” — degan savolni ko‘tarib, buning ehtimoliy variantlaridan biri sifatida iqtisodiyotni tilga oladi. Bunda Shavkat Mirziyoyevning Markaziy Osiyo mamlakatlarining samarali hamkorligi kelasi o‘n yil ichida mintaqa yalpi ichki mahsulotini kamida ikki baravar ko‘paytira olishi haqidagi gaplari eslatib o‘tildi.
Boshqa bir yo‘nalish sifatida mintaqaviy hamkorlik tuzilmasi qayd etiladi.
Maqolaga yakun yasar ekan, muallif Markaziy Osiyo mintaqasi savdo, turizm va madaniyat markaziga aylanib, shunchaki notanish geografik termindan kattaroq narsaga aylana olishi mumkinligi haqida xulosa qildi. “O‘zbekistonning so‘nggi tashabbuslari boshqa mamlakatlar manfaatlari uchun xizmat qilmaydigan, balki o‘ziga to‘q mintaqaga aylanadigan yangi Markaziy Osiyo uchun turtki bera oladi”, — deb yozdi u.
Izoh (0)