Халқ депутатлари Шеробод туман кенгашининг навбатдан ташқари сессиясида ташкилий масала кўрилди. Бу ҳақда, Сурхондарё вилояти ҳокими Эркинжон Турдимовнинг Facebook’даги саҳифасига асосланиб, «Правда Востока Онлайн» хабар бермоқда.
Унда Шеробод туманини ижтимоий-иқтисодий ривожлантириш, аҳолининг турмуш фаровонлигини юксалтириш борасида салмоқли ишлар олиб борилаётгани айтилган. Аммо, ютуқлар билан бирга айрим камчиликлар ҳам учраб тургани алоҳда қайд этилган. Жумладан, жорий йилнинг 9 ойи давомида фуқаролардан келиб тушган мурожаатларнинг 80 фоизига фақатгина тушунтириш берилган, мутасадди идораларда мурожаатлар билан ишлаш, масалани ҳал этишнинг аҳволи қониқарсиз.
Аҳолининг коммунал тўловлардан қарздорлиги юқори даражада сақланиб, ички йўлларни таъмирлаш, туманнинг экспорт салоҳияти паст аҳволда эканилиги қайд этилди. Шунингдек, ерларнинг мелиоратив ҳолатини яхшилаш ва қишлоқ хўжалигида агротехник тадбирларнинг ўз вақтида олиб борилмаётгани туман иқтисодиётига салбий таъсир кўрсатаётгани таъкидланди.
«Бу каби камчиликлар сабаб туман ҳокими вазифасида ишлаб келаётган Абдулҳаким Эшмуратов лавозимидан озод этилди», — дейилади хабарда.
Унинг ўрнига фаоллар, депутатлар, сиёсий партиялар вакилларининг таклиф ва мулоҳазалари инобатга олиниб, шу кунга қадар Сурхондарё вилояти ҳокимининг қишлоқ ва сув хўжалиги масалалари бўйича ўринбосари вазифасида ишлаб келаётган Ўрол Бобоқулов туман ҳокими этиб тасдиқланган.
Изоҳ (0)