2017 йил бошидан буён Ўзбекистонга киритилган чет эл инвестициялари 4 миллиард доллардан ошди. Бу ҳақда 8 ноябрь куни инвестицион муҳитни яхшилаш бўйича ўтказилган давра суҳбатида Давлат инвестициялар қўмитаси раиси Азим Аҳмадхўжаев баёнот берди, деб хабар қилади «Газета.uz».
Инвестициялар умумий ҳажмидан 3,7 миллиард долларлик улуши тўғридан-тўғри чет эли инвестицияларини ташкил этади. Инвесторлар орасида АҚШ, Туркия, Жанубий Корея, Германия, Россия ва Япония компаниялари бор.
2011–2016 йилларда Ўзбекистонда чет эл инвестициялари ҳажми 40 фоизга қисқарган, 3,3 миллиард доллардан 1,9 миллиард долларга тушган эди.
«2012 йилдан 2017 йилгача Ўзбекистон рейтингда 92 позицияга кўтарилиб, 166-ўриндан 74-гача кўтарилди. Бизнинг кейинги мақсадимиз анча жиддий — 2025 йилга қадар топ-20 га кирмоқчимиз», — деди Аҳмадхўжаев.
Қўмита раиси ушбу мақсад йўлида Ўзбекистон инвестицион сиёсати иқтисодиётнинг устувор йўналишларини ривожлантириш, чет эл инвестицияларини жалб этиш механизми самарадорлигини ошириш, инвесторлар билан ҳамкорликнинг янги йўлларини топиш ва янги лойиҳаларни ишлаб чиқишга урғу берган ҳолда такомиллаштириб борилишини маълум қилди.
Корпоратив молиявий ахборотга эга бўлиш имкониятларини яхшилаш ва маҳаллий компаниялар молиявий ҳисоботларини халқаро стандартлар даражасига етказиш қўмитанинг яна бир вазифасидир.
Ноябрнинг учинчи декадасида чет эл инвестициялари бўйича кенгашнинг йиғилиши бўлиб ўтиши кутилмоқда. Унда Ўзбекистонда хусусий-давлат ҳамкорлиги механизмларини, шунингдек, тегишли қонун лойиҳасини муҳокама қилиш режалаштирилмоқда.
Изоҳ (0)