Камҳаракат яшаш тарзи бевақт ўлим хавфини оширади

Сиз қимирламасдан қанча узоқроқ ўтирсангиз, соғлиғингизни шунча кўпроқ хавф-хатарга қўясиз. Колумбия университети тадқиқотчилари шундай хулосага келишди.

Камҳаракат яшаш тарзи ва бевақт ўлим орасидаги боғланишни тушуниш учун улар тўрт йил давомида 45 ёш ва ундан юқори ёшдаги 8000 нафар қатнашчиларнинг одатларини кузатиб бордилар. Уларнинг ўтириб ўтказган вақтлари аниқ бўлиши учун қатнашчилар белларига маҳкамланган акселерометрлар тақиб юришди.

Маълум бўлишича, ўртача олганда улар 16 соатлик куннинг 12 соатини ўтирган ҳолда ўтказганлар.

«Ёш ўтиши билан, организмнинг физиологик ва руҳий фаолияти ёмонлаша бошлаганда, биз кўпроқ ва янада кўпроқ ўтирамиз, — дейди тадқиқотнинг бош муаллифи, кардиолог Кит Диаз. — Бу фақат ўлим хавфини оширади. Бу ҳолатда ёш ҳам, жинс ҳам, вазн ҳам, спорт билан шуғулланиш ҳам натижани ўзгартира олмайди».

Бир кунда 13 соатдан кўпроқ ўтирадиганлар учун бевақт ўлим хавфи икки марта ошади.

Шунга қарамасдан олимлар икки кўрсатгич орасидаги фарқни аниқлашга уринмоқда: ўтирган ҳолатда ўтказилган умумий кундузги вақт ва ҳаракатсизликнинг узлуксиз даври. Агар ҳаракатсиз ҳолатда ўтириш 30 дақиқадан ошмаса, бевақт ўлим хавфи 55 фоизга камаяди.

Шунинг учун Диаз ҳар ярим соатда ўтирган жойингиздан туриб танаффус қилишни маслаҳат беради. Туринг ва беш дақиқа давомида ҳаракат қилинг ёки тез-тез қадам ташлаб юринг.

Манба: «Woman.ru»